:نیوز ڈیسک
کوئٹہ میں گیس لیکج کے باعث ہونے والے دو الگ الگ دھماکوں میں تین افراد جھلس کر زخمی ہوگئے، جس سے موسم سرما میں گیس کے بڑھتے ہوئے خطرات ایک بار پھر نمایاں ہوگئے ہیں۔
پہلا واقعہ نواں کلی کے علاقے عبدالخالق روڈ پر پیش آیا، جہاں ایک گھر میں گیس سلنڈر لیک ہونے سے زور دار دھماکہ ہوا اور آگ بھڑک اٹھی۔ اس حادثے میں ایک شخص جھلس کر زخمی ہوا۔
دوسرا دھماکہ عالمو پولیس کالونی میں اس وقت ہوا جب ایک گھر میں جمع شدہ گیس نے اچانک آگ پکڑ لی۔ واقعے میں باپ اور بیٹا جھلس کر زخمی ہوگئے۔
تمام زخمیوں کو فوری طور پر برن یونٹ منتقل کیا گیا، جہاں ڈاکٹرز نے ان کی حالت کو خطرے سے باہر قرار دیا ہے۔
ماہرین اور حکام نے شہریوں کو موسم سرما میں گیس ہیٹرز، سلنڈرز اور لائنز کی احتیاطی جانچ کرنے کی ہدایت کی ہے تاکہ ایسے واقعات سے بچا جا سکے۔
