نیوز ڈیسک: سیکیورٹی خدشات کے باعث ایک روز تک معطل رہنے والی بلوچستان کی ٹرین سروس بحال کر دی گئی ہے۔ ریلوے حکام کے مطابق پشاور کی جانب جانے والی جعفر ایکسپریس اور کراچی جانے والی بولان میل کو سبی سے دوبارہ روانہ کیا جائے گا۔
حکام کا کہنا ہے کہ جیکب آباد میں رکی ہوئی دونوں ٹرینوں کے مسافروں کی منتقلی کے لیے انتظامات مکمل کر لیے گئے ہیں۔ مسافروں کو چمن پسنجر ٹرین کی بوگیوں کے ذریعے سبی منتقل کیا جا رہا ہے، جہاں سے وہ اپنی اپنی منزل کی طرف سفر جاری رکھ سکیں گے۔
ریلوے حکام کے مطابق ٹرین آپریشن بحالی کے ساتھ سیکیورٹی اقدامات بھی مزید سخت کر دیے گئے ہیں تاکہ مسافروں کے سفر کو محفوظ بنایا جا سکے۔
