اسٹاف رپورٹر
بلوچستان کے بیشتر علاقوں میں مطلع جزوی طور پر ابر آلود رہے گا، جبکہ محکمہ موسمیات نے متعدد علاقوں میں تیز ہواؤں، گرج چمک، اور بارش کی پیشگوئی کی ہے۔
کوئٹہ، چمن، زیارت، بارکھان، سبی، کوہلو، قلعہ عبداللہ اور قلعہ سیف اللہ میں موسمی شدت متوقع ہے۔ علاوہ ازیں، نوشکی، ہرنائی، ژوب، موسیٰ خیل، خضدار، قلات، خاران، لسبیلہ، پنجگور اور چاغی میں بھی بارش اور ژالہ باری ہو سکتی ہے۔
محکمہ موسمیات کے مطابق بعض مقامات پر موسلا دھار بارش کا خدشہ ہے۔
درجہ حرارت کے لحاظ سے، کوئٹہ اور نوکنڈی میں زیادہ سے زیادہ 43 ڈگری سینٹی گریڈ جبکہ زیارت میں 21، ژوب میں 32، تربت میں 42 اور جیوانی میں 32 ڈگری ریکارڈ کیا گیا۔
