کوئٹہ، 9 اکتوبر (نیوز ڈیسک):
بلوچستان حکومت نے ساحلی شہر گوادر میں شدید قلتِ آب کے پیش نظر واٹر ایمرجنسی نافذ کر دی ہے۔ عوام کو فوری ریلیف فراہم کرنے کے لیے پانی کی فراہمی پر عائد تمام ٹیکس معطل کر دیے گئے ہیں۔
یہ فیصلہ وزیر اعلیٰ بلوچستان میر سرفراز بگٹی کی زیرِ صدارت ایک اعلیٰ سطحی اجلاس میں کیا گیا، جس میں گوادر میں پانی کے بحران اور متعلقہ محکموں کی کارکردگی کا تفصیلی جائزہ لیا گیا۔ وزیر اعلیٰ نے اقدامات میں سست روی پر شدید برہمی کا اظہار کرتے ہوئے متعلقہ حکام کو فوری اور نتیجہ خیز اقدامات کرنے کی ہدایت کی۔
“اگر یہ اقدامات فوری نتائج نہ دے سکے تو میں چیف سیکرٹری کے ہمراہ گوادر میں کیمپ لگا کر ذاتی طور پر فراہمیِ آب کی نگرانی کروں گا،”
— وزیر اعلیٰ بلوچستان میر سرفراز بگٹی
وزیر اعلیٰ نے کہا کہ گوادر کے عوام پانی کی کمی کے باعث شدید مشکلات کا سامنا کر رہے ہیں، اور صوبائی حکومت بحران کے خاتمے کے لیے تمام دستیاب وسائل بروئے کار لا رہی ہے۔
انہوں نے سوال اٹھایا کہ فنڈز کی بروقت فراہمی کے باوجود نمایاں پیش رفت کیوں نہیں ہو سکی؟ اور خبردار کیا کہ جو افسران فیصلہ سازی یا بحران سے نمٹنے کی صلاحیت نہیں رکھتے، وہ خود عہدہ چھوڑ دیں تاکہ ان کی جگہ مؤثر افسران کو تعینات کیا جا سکے۔
وزیر اعلیٰ نے ہدایت کی کہ برج فنانسنگ کے تحت دستیاب تمام فنڈز فوری طور پر استعمال میں لائے جائیں تاکہ عوام کو ریلیف فراہم کیا جا سکے۔ انہوں نے کہا کہ عوام کو پانی کے لیے تڑپتا نہیں دیکھ سکتے، عوامی ریلیف حکومت کی اولین ترجیح ہے۔
انہوں نے ٹینکر مافیا کے خلاف سخت کارروائی کے احکامات بھی جاری کیے اور واضح کیا کہ بحران کے دوران کسی قسم کی بلیک میلنگ برداشت نہیں کی جائے گی۔
وزیر اعلیٰ نے غیر فعال 11 ڈی سیلینیشن پلانٹس کی بحالی کے لیے ہنگامی بنیادوں پر فزیبلٹی رپورٹ تیار کرنے کی ہدایت کی، اور کہا کہ ان منصوبوں کے فعال ہونے سے پانی کی فراہمی میں نمایاں بہتری ممکن ہے۔
انہوں نے اس بات پر زور دیا کہ گوادر کا پانی بحران صرف انتظامی مسئلہ نہیں بلکہ ایک انسانی اور ترقیاتی چیلنج ہے، جس کے مستقل حل کے لیے تمام سیاسی جماعتوں، اداروں اور اسٹیک ہولڈرز کو اعتماد میں لیا جائے گا۔
اجلاس میں چیف سیکرٹری بلوچستان شکیل قادر خان، ایڈیشنل چیف سیکرٹری منصوبہ بندی و ترقیات زاہد سلیم، سیکرٹری خزانہ عمران زرکون، سیکرٹری پی ایچ ای ہاشم غلزئی، پرنسپل سیکرٹری وزیر اعلیٰ بابر خان اور ایڈیشنل سیکرٹری محمد فریدون نے شرکت کی۔
ویڈیو لنک کے ذریعے ایم پی اے گوادر مولانا ہدایت الرحمٰن، چیئرمین گوادر پورٹ اتھارٹی نور الحق بلوچ، چیئرمین جی ڈی اے معین الرحمٰن اور کمشنر مکران ڈویژن قادر بخش پرکانی بھی اجلاس میں شریک ہوئے۔
