سردار محمد خوندئ، ایوب بھٹو، آصف کریم کھیتران، نیوز ڈیسک:
کوئٹہ سمیت بلوچستان کے مختلف علاقوں میں اتوار کےروز شٹر ڈاؤن اور پہیہ جام ہڑتال کے باعث معمولاتِ زندگی بری طرح متاثر ہو گئے۔ صوبائی دارالحکومت میں جگہ جگہ پولیس کی بھاری نفری تعینات رہی جبکہ مختلف مقامات پر گرفتاریوں کی بھی اطلاعات ہیں۔
کوئٹہ کے تمام بڑے بازار، تجارتی مراکز اور دکانیں مکمل طور پر بند رہیں۔ عوامی ٹرانسپورٹ سڑکوں سے غائب رہی جس کے باعث شہریوں کو شدید مشکلات کا سامنا کرنا پڑا۔ مظاہرین کی جانب سے شہر کی اہم شاہراہوں اور بلوچستان کو دیگر علاقوں سے ملانے والی مرکزی ہائی ویز کو بلاک کر دیا گیا۔
یہ ہڑتال تحریکِ تحفظِ آئین پاکستان (پاکستان آئین تحفظ موومنٹ) کی جانب سے دی گئی تھی، جس نے 8 فروری 2024 کے عام انتخابات میں مبینہ دھاندلی کے خلاف احتجاج کا اعلان کیا تھا۔ موومنٹ میں شامل جماعتوں کے کارکنان نے مختلف مقامات پر احتجاجی مظاہرے کیے اور ٹریفک کی روانی معطل کر دی۔
امن و امان کی صورتحال برقرار رکھنے کے لیے پولیس کو حساس علاقوں میں تعینات کیا گیا، جبکہ بعض مقامات پر مظاہرین اور قانون نافذ کرنے والے اداروں کے درمیان کشیدگی بھی دیکھی گئی۔
ہڑتال کے باعث کاروباری سرگرمیاں، تعلیمی ادارے اور روزمرہ زندگی بری طرح متاثر ہوئی، جس سے شہریوں میں تشویش پائی جاتی ہے
