سٹاف رپورٹر
کوئٹہ؛ یومِ تکبیر کے موقع پر بلوچستان بھر میں ضلعی انتظامیہ، سیاسی جماعتوں، سماجی تنظیموں اور سول سوسائٹی کے اشتراک سے ریلیوں کا انعقاد کیا گیا تاکہ 28 مئی 1998 کو ایٹمی دھماکے کے ذریعے حاصل کی گئی دفاعی طاقت اور قومی خودمختاری کو خراجِ تحسین پیش کیا جا سکے۔
صوبائی دارالحکومت کوئٹہ میں مرکزی ریلی کی قیادت بلوچستان کے وزیر صحت بخت محمد کاکڑ نے کی۔ ان کے ہمراہ ایڈیشنل ڈپٹی کمشنر (جنرل) محمد انور کاکڑ اور ایڈیشنل ڈپٹی کمشنر (ریونیو) محمد وقار کاکڑ بھی موجود تھے۔ ریلی کا آغاز ڈپٹی کمشنر آفس سے ہوا جو مختلف شاہراہوں سے گزرتی ہوئی اسمبلی چوک پر اختتام پذیر ہوئی۔
اس موقع پر وزیر صحت بخت محمد کاکڑ نے کہا: “یومِ تکبیر ہماری قومی خودمختاری کے عزم کی یاد دلاتا ہے۔ ہم ان تمام شہداء کو خراجِ عقیدت پیش کرتے ہیں جنہوں نے مادرِ وطن کی خاطر اپنی جانیں قربان کیں۔”
انہوں نے مزید کہا: “سابق وزیراعظم نواز شریف کا جرات مندانہ فیصلہ پاکستان کی تاریخ کا اہم موڑ تھا جس نے ہمیں ناقابلِ تسخیر دفاع فراہم کیا۔”
وزیر صحت نے پاک افواج کی قربانیوں کو بھی سراہتے ہوئے کہا: “ہماری افواج ہمیشہ دشمن کے خلاف ڈٹ کر کھڑی رہی ہیں۔ ان کی قربانیاں ہماری تاریخ کا فخر ہیں۔”
ریلی میں بڑی تعداد میں سرکاری افسران، طلباء، اساتذہ، سول سوسائٹی کے اراکین اور شہریوں نے شرکت کی۔ شرکاء نے قومی پرچم اور یومِ تکبیر کے حوالے سے بینرز اٹھا رکھے تھے جبکہ ملی نغمے بھی بجائے گئے جنہوں نے ماحول کو جوش و خروش سے بھر دیا۔
ملک کے دیگر حصوں میں بھی یومِ تکبیر کے موقع پر سیاسی جماعتوں، سماجی تنظیموں اور شہریوں کی جانب سے ریلیاں نکالی گئیں۔ ان ریلیوں میں شہداء کو خراجِ عقیدت پیش کیا گیا اور پاکستان کو ایٹمی طاقت بنانے پر سابق وزیراعظم نواز شریف اور افواجِ پاکستان کی خدمات کو سراہا گیا۔ شرکاء نے اس دن کو دشمن کے خلاف ایک مضبوط پیغام قرار دیا
