نیوز ڈیسک
کوئٹہ: ڈائریکٹر جنرل ایف آئی اے کی ہدایت پر حوالہ ہنڈی اور غیر قانونی کرنسی ایکسچینج کے خلاف بڑی کارروائیاں جاری ہیں۔ ایف آئی اے کمرشل بینکنگ سرکل کوئٹہ اور کمپوزٹ سرکل گوادر نے مشترکہ آپریشن کے دوران 4 ملزمان کو گرفتار کر لیا۔
ایف آئی اے ترجمان کے مطابق گرفتار افراد میں حاجی شریف، عبدالرحمن، ریاض اور نزیر احمد شامل ہیں، جنہیں کوئٹہ اور گوادر کے مختلف علاقوں سے گرفتار کیا گیا۔
ترجمان نے بتایا کہ ملزمان کے قبضے سے بھاری مقدار میں ملکی و غیر ملکی کرنسی برآمد کی گئی جن میں:
- 1072 امریکی ڈالر
- 5770 افغانی
- 2485 ترک لیرا
- 9 لاکھ انڈونیشین روپیہ
- 5.3 ملین ایرانی ریال
- 27 لاکھ پاکستانی روپے
شامل ہیں۔ اس کے علاوہ 23 سے زائد چیک بکس، موبائل فونز اور دیگر ریکارڈ بھی برآمد ہوا۔
مزید تحقیقات میں انکشاف ہوا ہے کہ ملزمان بغیر لائسنس کرنسی ایکسچینج کا غیر قانونی کاروبار کر رہے تھے اور ان کے بینک اکاؤنٹس سے کروڑوں روپے کی حوالہ ہنڈی ٹرانزیکشنز کی جا چکی ہیں۔
ترجمان کے مطابق ملزمان برآمد ہونے والی کرنسی کے حوالے سے حکام کو مطمئن نہ کر سکے، جس پر ان کے خلاف مقدمہ درج کر کے تفتیش شروع کر دی گئی ہے۔ ایف آئی اے ٹیمیں ملزمان کے دیگر ساتھیوں کی گرفتاری کے لیے مزید چھاپے مار رہی ہیں۔
