نیوز ڈیسک:
پاکستان تحریک انصاف (پی ٹی آئی) بلوچستان نے امن و امان، عوامی تحفظ اور حکومتی پابندیوں کے خدشات کے پیش نظر کوئٹہ میں ہونے والا مجوزہ جلسہ منسوخ کرنے کا اعلان کیا ہے۔
ایک مشترکہ پریس کانفرنس میں پی ٹی آئی بلوچستان کے صدر داؤد شاہ کاکڑ، جنرل سیکریٹری جہانگیر رند، نور خان خلجی، زین العابدین خلجی، جان بلوچ، نواب دومر، اسحاق ترین اور دیگر پارٹی رہنماؤں نے کہا کہ یہ فیصلہ عوام اور کارکنوں کے تحفظ اور انتشار سے بچاؤ کے لیے کیا گیا ہے۔
رہنماؤں نے کہا کہ پاکستان تحریک انصاف ایک پُرامن، جمہوری اور آئینی سیاسی جماعت ہے جسے موجودہ حکومت جان بوجھ کر دباؤ میں لانے کی کوشش کر رہی ہے۔ ان کا کہنا تھا کہ تمام قانونی تقاضے پورے کرنے اور ڈپٹی کمشنر، محکمہ داخلہ اور ہائی کورٹ سے اجازت حاصل کرنے کے باوجود انتظامیہ نے جلسہ روکنے کے لیے مصنوعی رکاوٹیں پیدا کیں۔
انہوں نے کہا کہ "جلسے کے روز میدان میں پانی چھوڑا گیا، انٹرنیٹ سروس معطل کی گئی، شہر کے داخلی و خارجی راستے بند کر دیے گئے اور کوئٹہ میں کرفیو جیسا ماحول پیدا کر دیا گیا — جو حکومت کی بوکھلاہٹ اور تحریک انصاف کی بڑھتی مقبولیت کا واضح ثبوت ہے۔”
پی ٹی آئی بلوچستان کے رہنماؤں نے بتایا کہ اگرچہ جلسے کا اعلان 7 ستمبر 2025 کو کیا گیا تھا، لیکن اب 7 نومبر 2025 کا جلسہ عوامی مفاد اور امن و امان کی صورتحال کے پیش نظر ملتوی کر دیا گیا ہے۔ جماعت نے کہا کہ جلسے کی نئی تاریخ جلد اعلان کی جائے گی۔
رہنماؤں نے اس عزم کا اظہار کیا کہ جلسے جلوس اور پُرامن سیاسی سرگرمیاں پاکستان کے آئین کے تحت ہر شہری کا آئینی اور جمہوری حق ہیں، اور تحریک انصاف اپنی سیاسی جدوجہد پرامن اور قانونی طریقے سے جاری رکھے گی
