سردار محمد خوندئی:
قلعہ عبداللہ میں لیویز فورس کے اہلکاروں نے منگل کے روز حکومت کی جانب سے لیویز فورس کو پولیس میں ضم کرنے کے فیصلے کے خلاف احتجاجی مظاہرہ کیا۔ احتجاج کے دوران متعدد اہلکاروں نے اپنی روایتی سابقہ سرکاری وردی پہن رکھی تھی اور مرکزی شاہراہ کو بلاک کرکے فیصلے کے خلاف نعرے بازی کی۔ اس مظاہرے کے باعث ٹریفک کی روانی متاثر ہوئی اور شہریوں کی بڑی تعداد موقع پر جمع ہوگئی۔
مظاہرین نے مطالبہ کیا کہ حکومت فورس کے انضمام کے فیصلے کو واپس لے کیونکہ لیویز فورس کئی دہائیوں سے بلوچستان کے عوام کی خدمت کر رہی ہے اور دور دراز علاقوں میں امن و امان برقرار رکھنے میں اہم کردار ادا کرتی ہے۔
یاد رہے کہ quettavoice.com نے اس سے قبل رپورٹ کیا تھا کہ بلوچستان حکومت نے 142 سال بعد لیویز فورس کو باضابطہ طور پر پولیس میں ضم کر دیا ہے، جس کے بعد صوبے بھر میں یہ فیصلہ بحث کا باعث بن گیا ہے
