الیکشن کمیشن آف پاکستان منگل (23 فروری) کو ایک غیرمعمولی اور متنازع انتخابی معاملے کی سماعت کرنے جا رہا ہے، جس کا تعلق بلوچستان اسمبلی کے حلقہ پی بی 21 (حب) میں ووٹوں کی دوبارہ گنتی سے ہے۔ اس گنتی کے بعد ڈالے گئے ووٹوں اور مسترد شدہ بیلٹ پیپرز کی تعداد میں غیرمعمولی اضافہ سامنے آیا، جس نے انتخابی نتیجے کو مکمل طور پر بدل دیا۔
یہ دوبارہ گنتی عام انتخابات 8 فروری 2024 کے تقریباً دو ماہ بعد 39 پولنگ اسٹیشنز پر کی گئی۔ نئی گنتی کے مطابق ووٹر ٹرن آؤٹ میں بھی اضافہ ظاہر کیا گیا، جو پہلے 55.15 فیصد تھا اور بعد میں 58.48 فیصد ریکارڈ کیا گیا۔
دوبارہ گنتی سے قبل بلوچستان عوامی پارٹی کے محمد صالح بھوتانی واضح اکثریت کے ساتھ کامیاب قرار پائے تھے اور انہوں نے اپنے حریفوں کے مقابلے میں دگنے سے بھی زیادہ ووٹ حاصل کیے تھے۔ تاہم نئی گنتی کے بعد پاکستان پیپلز پارٹی کے علی حسن زہری کو کامیاب قرار دے دیا گیا، حالانکہ ابتدائی نتائج میں وہ دوسرے نمبر پر بھی نہیں تھے، جبکہ بھوتانی تیسرے نمبر پر چلے گئے۔
یہ معاملہ اس وقت مزید سنگین ہو گیا جب انتخابی مواد محفوظ رکھنے والے اسٹرونگ روم سے پانچ افراد کو گرفتار کیا گیا۔ حکام کے مطابق گرفتار افراد کے قبضے سے مبینہ جعلی بیلٹ پیپرز برآمد ہوئے اور وہ انتخابی ریکارڈ میں ردوبدل کی کوشش کر رہے تھے۔ یہ گرفتاریاں 11 فروری 2024 کو ہوئیں، یعنی اسی دن جب الیکشن کمیشن نے پہلی مرتبہ ووٹوں کی دوبارہ گنتی کا حکم دیا تھا۔
اعداد و شمار نے بھی کئی سوالات کو جنم دیا۔ محمد صالح بھوتانی کے ووٹ 30,910 سے کم ہو کر 17,403 رہ گئے، یعنی 13,507 ووٹوں کی کمی ہوئی۔ حیران کن طور پر اتنی ہی تعداد میں مسترد شدہ ووٹوں میں اضافہ ہوا، جو 3,648 سے بڑھ کر 17,155 ہو گئے۔
اسی دوران مجموعی طور پر ڈالے گئے ووٹوں کی تعداد 76,976 سے بڑھ کر 87,483 ہو گئی، یعنی 10,507 ووٹوں کا اضافہ ریکارڈ کیا گیا۔ ان میں سے 9,854 ووٹ علی حسن زہری کے کھاتے میں ڈالے گئے، جبکہ 441 ووٹ رجب علی کو ملے۔ باقی 212 ووٹ دیگر امیدواروں میں تقسیم کیے گئے، سوائے محمد صالح بھوتانی کے۔
اگرچہ علی حسن زہری کو 19 دسمبر 2024 کو کامیاب قرار دے دیا گیا تھا، تاہم یہ معاملہ مسلسل عدالتی کارروائیوں کی نذر رہا۔ 20 نومبر 2024 کو سپریم کورٹ آف پاکستان نے تمام سابقہ کارروائیاں کالعدم قرار دیتے ہوئے الیکشن کمیشن کو معاملہ ازسرِنو سننے اور فیصلہ کرنے کی ہدایت دی۔
اس کے باوجود، الیکشن کمیشن نے 16 دسمبر 2024 کو تین کے مقابلے میں دو کی اکثریتی رائے سے دوبارہ گنتی کو برقرار رکھا، جس پر محمد صالح بھوتانی نے پہلے بلوچستان ہائی کورٹ اور بعد ازاں فیڈرل آئینی عدالت سے رجوع کیا۔
حال ہی میں فیڈرل آئینی عدالت نے علی حسن زہری کی کامیابی کا نوٹیفکیشن معطل کرتے ہوئے الیکشن کمیشن کو زیر التوا درخواستوں پر دوبارہ غور کرنے کا حکم دیا۔ عدالت نے اپنے فیصلے میں کہا کہ ووٹوں کی دوبارہ گنتی صرف ٹھوس شواہد کی بنیاد پر ہی کی جا سکتی ہے اور بیلٹ پیپر کی حرمت کو غیر واضح یا بے بنیاد الزامات کی بنیاد پر متاثر نہیں کیا جانا چاہیے۔
