ویب ڈیسک
اسلام آباد:
پاکستان اور ایران کے درمیان تعلقات کو مزید مضبوط بنانے کی جانب ایک اہم قدم اٹھاتے ہوئے، ایرانی وزیر خارجہ سید عباس عراقچی نے جنرل ہیڈکوارٹر (جی ایچ کیو) راولپنڈی میں چیف آف آرمی اسٹاف جنرل سید عاصم منیر سے ملاقات کی۔
پاک فوج کے شعبۂ تعلقات عامہ (آئی ایس پی آر) کے مطابق، ملاقات میں خطے کی مجموعی صورتحال، سیکیورٹی چیلنجز اور پاک-ایران بارڈر مینجمنٹ پر تفصیلی تبادلہ خیال کیا گیا۔
دونوں رہنماؤں نے اس بات پر زور دیا کہ باہمی سیکیورٹی تعاون اور سرحدی نگرانی کو مزید مؤثر بنانے کے لیے دوطرفہ اقدامات ناگزیر ہیں۔ اس موقع پر جنرل عاصم منیر نے کہا کہ پاکستان اور ایران کے درمیان گہرے مذہبی، ثقافتی اور تاریخی رشتے ہیں جو باہمی تعلقات کی بنیاد ہیں۔
ایرانی وزیر خارجہ نے علاقائی امن کے قیام میں پاکستان کے کردار کو سراہا اور باہمی شراکت داری کو فروغ دینے کے عزم کا اظہار کیا۔ ملاقات کے دوران مستقبل میں مشترکہ سیکیورٹی اقدامات اور تعاون کو وسعت دینے پر اتفاق کیا گیا۔
اسی دوران ایرانی وزیر خارجہ نے صدر مملکت آصف علی زرداری اور وزیراعظم شہباز شریف سے بھی الگ الگ ملاقاتیں کیں، جن میں خطے میں بڑھتی ہوئی کشیدگی، خصوصاً بھارت کے جارحانہ رویے اور حالیہ پہلگام واقعہ پر گفتگو کی گئی۔
صدر مملکت نے ایران کے ساتھ دوطرفہ تعلقات کو مزید مضبوط بنانے کی ضرورت پر زور دیا، جبکہ وزیراعظم شہباز شریف نے ایران کے شہر بندر عباس میں ہونے والے سانحے پر افسوس کا اظہار کرتے ہوئے ایرانی قیادت سے اظہارِ ہمدردی کیا۔
یہ سفارتی روابط دونوں ممالک کے درمیان ہم آہنگی، سیکیورٹی تعاون اور خطے میں پائیدار امن کے قیام کے لیے سنجیدہ کوششوں کی عکاسی کرتے ہیں۔
