نیوز ڈیسک :
ترکی کے دارالحکومت استنبول میں پاکستان اور افغانستان کے درمیان مذاکرات کا دوسرا دور آج منعقد ہو رہا ہے، جس میں سرحدی کشیدگی، سرحد پار دہشت گردی اور افغان مہاجرین کے مسائل سمیت متعدد اہم امور پر بات چیت کی جائے گی۔
ذرائع کے مطابق مذاکرات میں پاکستان اور افغان حکومت کے اعلیٰ سطحی وفود شرکت کر رہے ہیں، جبکہ قطر اور ترکی ان مذاکرات میں ثالثی اور سہولت کاری کا کردار ادا کر رہے ہیں۔
مذاکرات کے پہلے مرحلے میں فریقین نے بنیادی نکات پر تبادلہ خیال کیا تھا، تاہم اب دوسرے مرحلے میں عملی پیش رفت کی توقع کی جا رہی ہے۔
پاکستان نے بارہا افغان حکومت پر کالعدم تحریکِ طالبان پاکستان (ٹی ٹی پی) کے دہشت گردوں کو پناہ دینے کا الزام عائد کیا ہے، جبکہ کابل ان الزامات کی تردید کرتا آیا ہے۔
ذرائع کا کہنا ہے کہ دونوں ممالک کے درمیان جاری حالیہ کشیدگی اور سرحدی جھڑپوں کے بعد یہ مذاکرات نہایت اہمیت اختیار کر گئے ہیں، جن سے خطے میں امن و استحکام کی نئی راہیں کھلنے کی امید کی جا رہی ہے
