منان مندوخیل
کوئٹہ، نیشنل کینسر سروائیورز ڈے ہر سال جون میں ان افراد کی زندگی اور جدوجہد کو خراج تحسین پیش کرنے کے لیے منایا جاتا ہے جو کینسر کو شکست دے چکے ہیں۔ اس موقع پر سینار کینسر ہسپتال کوئٹہ میں ایک پروقار تقریب کا انعقاد کیا گیا، جس میں مختلف شعبہ ہائے زندگی سے تعلق رکھنے والے افراد نے شرکت کی۔
یہ دن نہ صرف کینسر سے بچ جانے والوں کی بہادری، صبر اور حوصلے کو سراہنے کا موقع ہوتا ہے بلکہ خاندان، دوستوں اور طبی عملے کی مسلسل حمایت کو بھی تسلیم کیا جاتا ہے۔ اس تقریب کا مقصد عوام میں کینسر سے بچاؤ، بروقت تشخیص اور علاج کی اہمیت کے حوالے سے آگاہی پیدا کرنا بھی تھا۔
تقریب کے مہمانانِ خصوصی میں ڈائریکٹر سینار کینسر ہسپتال حافظ خوش نصیب احمد، پروفیسر ڈاکٹر محمد حنیف مینگل، ڈی جی سوشل ویلفیئر قربان مگسی، جمعہ خان خلجی، سید عبدالمنان آغا، ڈاکٹر فیروز خان اچکزئی (کینسر اسپیشلسٹ)، ڈاکٹر حمیدہ کھوسو، ڈاکٹر ماجبین مری اور ڈاکٹر جمیلہ کاکڑ شامل تھے۔
مقررین نے اپنے خطاب میں کینسر سے بچ جانے والے افراد کو خراج تحسین پیش کیا اور ان کی زندگی کی جدوجہد کو ایک مثال قرار دیا۔ مقررین نے اس بات پر زور دیا کہ کینسر کا علاج ممکن ہے بشرطیکہ بروقت تشخیص اور مکمل تعاون فراہم کیا جائے۔
ڈاکٹر فیروز خان اچکزئی نے اپنے خطاب میں کہا، "یہ دن صرف ایک تقریب نہیں بلکہ ایک پیغام ہے کہ کینسر کا مقابلہ ممکن ہے، اور ہم سب کو مل کر اس کے خلاف آواز بلند کرنی ہے۔”
تقریب کا اختتام کینسر سے بچ جانے والوں کو اعزازات پیش کرنے اور ان کے حوصلے کو سلام پیش کرنے کے ساتھ ہوا۔
