اسلام آباد (نیوز رپورٹر)
وزیر خارجہ پاکستان اسحاق ڈار نے ایک اہم بیان میں اس بات کی تصدیق کی ہے کہ پاکستان اور بھارت نے فوری طور پر جنگ بندی پر اتفاق کر لیا ہے۔ یہ فیصلہ خطے میں کشیدگی کو کم کرنے اور امن و استحکام کے قیام کے لیے ایک بڑی پیش رفت کے طور پر دیکھا جا رہا ہے۔
وزیر خارجہ نے کہا کہ پاکستان نے ہمیشہ اپنی خودمختاری اور علاقائی سالمیت پر سمجھوتہ کیے بغیر خطے میں امن و سلامتی کے لیے مثبت اقدامات کیے ہیں۔ ان کا مزید کہنا تھا کہ پاکستان امن کا خواہاں ہے اور ہمسایہ ممالک کے ساتھ پرامن تعلقات کا خواہاں رہا ہے۔
اس معاہدے کو عالمی سطح پر بھی سراہا جا رہا ہے، جہاں ماہرین اسے جنوبی ایشیا میں دیرپا امن کے لیے ایک امید کی کرن قرار دے رہے ہیں۔ دفاعی تجزیہ کاروں کے مطابق، دونوں ممالک کے درمیان کشیدگی میں کمی نہ صرف داخلی استحکام بلکہ اقتصادی ترقی کے لیے بھی اہم ثابت ہو سکتی ہے۔
ذرائع کے مطابق جنگ بندی معاہدے کے تحت لائن آف کنٹرول (ایل او سی) پر فائر بندی پر سختی سے عمل درآمد کیا جائے گا، اور دونوں اطراف اعتماد سازی کے اقدامات اٹھائے جائیں گے۔
یہ پیش رفت ایسے وقت میں سامنے آئی ہے جب خطے میں بڑھتی ہوئی کشیدگی اور مسلسل جھڑپوں نے نہ صرف دونوں ممالک بلکہ عالمی برادری کو بھی تشویش میں مبتلا کر رکھا تھا۔
