کوئٹہ: الیکشن کمیشن آف پاکستان نے اعلان کیا ہے کہ بلوچستان صوبائی اسمبلی کے حلقہ پی بی 36 قلات کے سات پولنگ اسٹیشنوں پر 10 مارچ 2026 کو دوبارہ پولنگ ہوگی۔
اس مقصد کے لیے صوبائی الیکشن کمشنر بلوچستان علی اصغر سیال نے ڈپٹی کمشنر قلات منیر احمد درانی سے ڈسٹرکٹ ریٹرننگ آفیسر کے طور پر حلف لیا۔ حکام کے مطابق دوبارہ پولنگ کے شفاف اور غیر جانبدار انعقاد کو یقینی بنانے کے لیے تمام انتظامی اور سیکیورٹی تیاریاں مکمل کی جا رہی ہیں۔
الیکشن کمیشن کی جانب سے پولنگ عملے کی تربیت، انتخابی سامان کی بروقت فراہمی اور دیگر ضروری انتظامات پر خصوصی توجہ دی جا رہی ہے۔ ضلعی انتظامیہ، پولیس اور متعلقہ اداروں کے تعاون سے ووٹرز کو پرامن ماحول میں آزادانہ طور پر حقِ رائے دہی استعمال کرنے کا مکمل موقع فراہم کیا جائے گا۔
