مانیٹرنگ ڈیسک : تہران/تل ابیب – 15 جون 2025:
ایران نے ایک بار پھر اسرائیل کے بڑے شہروں کو میزائل حملوں کا نشانہ بنایا ہے۔ ایرانی میزائل حملوں کے نتیجے میں تل ابیب اور مقبوضہ بیت المقدس میں شدید دھماکوں کی آوازیں سنی گئی ہیں، جس سے شہریوں میں شدید خوف و ہراس پھیل گیا۔
ایرانی فورسز کی جانب سے کیے گئے تازہ حملے میں تل ابیب میں تباہی کی اطلاعات موصول ہوئی ہیں۔ حکام کے مطابق سات اسرائیلی شہری حملے کے بعد لاپتا ہیں، جن کی تلاش کے لیے ریسکیو اور سکیورٹی ادارے سرگرم ہیں۔
اس سے قبل آج صبح ایرانی افواج نے اسرائیلی بندرگاہی شہر حیفہ پر 100 سے زائد میزائل داغے تھے، جن میں اب تک موصولہ اطلاعات کے مطابق کم از کم 8 افراد ہلاک اور 200 سے زائد زخمی ہوئے ہیں۔ مقامی اسپتالوں میں ایمرجنسی نافذ ہے اور زخمیوں کو فوری طبی امداد دی جا رہی ہے۔
علاقے میں کشیدگی میں خطرناک حد تک اضافہ ہو چکا ہے۔ اسرائیلی فضائی حدود میں جنگی طیارے مسلسل گشت کر رہے ہیں جبکہ شہری دفاعی نظام کو مکمل طور پر متحرک کر دیا گیا ہے۔
ایرانی ذرائع کے مطابق یہ حملے اسرائیل کی حالیہ فضائی کارروائیوں کے ردعمل میں کیے گئے ہیں، جن میں شام اور لبنان میں ایرانی حمایت یافتہ اہداف کو نشانہ بنایا گیا تھا۔
بی بی سی کے نمائندے کے مطابق تل ابیب میں کچھ ایرانی میزائل اسرائیلی دفاعی نظام نے روک لیے، تاہم چند میزائل شہر کے مرکزی علاقوں تک پہنچنے میں کامیاب رہے۔ ان حملوں کے بعد شہریوں میں شدید خوف ہے اور پناہ گاہوں میں لوگوں کی بڑی تعداد دیکھی جا رہی ہے۔
عالمی برادری نے فوری جنگ بندی اور تحمل کا مظاہرہ کرنے کی اپیل کی ہے، جب کہ اقوام متحدہ کی سلامتی کونسل نے ہنگامی اجلاس طلب کر لیا ہے۔
