ذیشان شاہ:
اسلام آباد: وفاقی دارالحکومت کے علاقے ترلائی میں واقع امام بارگاہ خدیجۃ الکبریٰ میں نمازِ جمعہ کے دوران ہونے والے زور دار دھماکے کے نتیجے میں کم از کم 31 افراد جاں بحق جبکہ 169 افراد زخمی ہو گئے۔ ضلعی انتظامیہ کے مطابق ہلاکتوں اور زخمیوں کی تعداد میں اضافے کا خدشہ ہے۔
دھماکے کے وقت امام بارگاہ میں بڑی تعداد میں نمازی موجود تھے۔ اچانک ہونے والے دھماکے سے عبادت گاہ میں شدید خوف و ہراس پھیل گیا، فرش پر ملبہ، ٹوٹا ہوا شیشہ اور نمازیوں کا سامان بکھر گیا۔
عینی شاہدین کے مطابق کئی زخمی افراد مدد کے منتظر رہے جبکہ بعض نمازی زخمیوں کو باہر منتقل کرنے میں مصروف دکھائی دیے۔ امام بارگاہ کے بیرونی باغیچے میں بھی متعدد زخمیوں کو امداد کے انتظار میں پڑا دیکھا گیا۔
واقعے کے فوراً بعد ریسکیو ادارے اور قانون نافذ کرنے والے اہلکار موقع پر پہنچ گئے اور زخمیوں کو قریبی اسپتالوں میں منتقل کیا گیا۔ دارالحکومت کے بڑے اسپتالوں میں ہنگامی حالت نافذ کر دی گئی تاکہ متاثرین کو فوری طبی امداد فراہم کی جا سکے۔
سیکیورٹی اداروں نے علاقے کو گھیرے میں لے کر تحقیقات کا آغاز کر دیا ہے، جبکہ عوام سے اپیل کی گئی ہے کہ مصدقہ معلومات کے بغیر قیاس آرائی سے گریز کریں۔
یہ واقعہ زیرِ تفتیش ہے اور مزید تفصیلات موصول ہونے پر خبر کو اپ ڈیٹ کیا جائے گا
