سید علی شاہ، نیوز ڈیسک : کوئٹہ:
ڈیگاری میں مبینہ غیرت کے نام پر خاتون اور مرد کے قتل کے کیس میں اہم پیش رفت سامنے آئی ہے، جہاں مرکزی ملزم سردار شیر باز ساتکزئ کو انسدادِ دہشتگردی عدالت (ATC-I) کوئٹہ میں پیش کیا گیا۔
انسدادِ دہشتگردی کے جج محمد مبین نے کیس کی سماعت کی اور خصوصی کرائم انویسٹی گیشن ونگ (SCIW) کی درخواست پر ملزم کو 10 روزہ جسمانی ریمانڈ پر پولیس کے حوالے کر دیا۔
پولیس کے مطابق سردار شیر باز ساتکزئ پر الزام ہے کہ اس نے کوئٹہ کے نواحی علاقے ڈیگاری-سنجیدی میں ایک مرد اور خاتون کے قتل کا حکم دیا، جسے غیرت کے نام پر قتل کا رنگ دیا گیا۔
یاد رہے کہ اس واقعے پر صوبہ بھر میں شدید عوامی غم و غصہ پایا جاتا ہے، جبکہ بلوچستان ہائیکورٹ کے چیف جسٹس نے از خود نوٹس بھی لیا ہے۔ واقعے کے بعد حکومت پر سخت قانونی کارروائی اور انصاف کی فراہمی کے لیے دباؤ بڑھ گیا ہے۔
پولیس کا کہنا ہے کہ مزید ملزمان کی گرفتاری اور تفتیش کے لیے ریمانڈ کی ضرورت ہے۔ عدالت نے ریمانڈ منظور کرتے ہوئے کیس کی اگلی سماعت ریمانڈ کی مدت پوری ہونے کے بعد مقرر کی ہے۔
