لورالائی:
ایف سی ہیڈکوارٹر لورالائی میں ایک بڑا قبائلی جرگہ منعقد ہوا، جس میں صوبائی قیادت، اعلیٰ عسکری حکام اور بڑی تعداد میں قبائلی عمائدین نے شرکت کی۔ جرگے میں علاقائی امن، قبائلی ہم آہنگی اور ترقیاتی امور پر مفصل گفتگو کی گئی۔
تقریب کے مہمانِ خصوصی گورنر بلوچستان جعفر خان مندوخیل تھے، جبکہ وزیر اعلیٰ بلوچستان سرفراز بگٹی، کمانڈر کوئٹہ کور، سابق گورنر گل محمد جوگیزئی، آئی جی ایف سی بلوچستان نارتھ، آئی جی پولیس اور کمشنر لورالائی ڈویژن بھی شریک ہوئے۔ اعلیٰ حکام کی شرکت سے جرگے کی اہمیت مزید اجاگر ہوئی۔
جرگے کے دوران شرکاء نے علاقے کی مجموعی سیکیورٹی صورتحال، قبائلی روابط کے مضبوط بنانے، مقامی ترقیاتی مسائل اور دیرپا امن کے قیام میں عوامی کردار پر تبادلۂ خیال کیا۔ قبائلی عمائدین نے پاک فوج اور ایف سی بلوچستان نارتھ کی جانب سے امن کی بحالی کے لیے کی گئی خدمات کو سراہا۔
گورنر جعفر خان مندوخیل نے خطاب میں کہا کہ قبائلی عوام ہمیشہ سے ریاستی اداروں کے مضبوط شراکت دار رہے ہیں۔ انہوں نے اس بات پر زور دیا کہ امن کے تسلسل، ترقیاتی منصوبوں کی کامیابی اور نوجوانوں کے بہتر مستقبل کے لیے مشترکہ حکمت عملی ناگزیر ہے۔
وزیر اعلیٰ سرفراز بگٹی نے اپنے بیان میں کہا کہ پاک فوج اور ایف سی خطے میں پائیدار امن، سماجی استحکام اور بنیادی سہولیات کی بہتری کے لیے تمام وسائل استعمال کرتی رہے گی۔ انہوں نے کہا کہ علاقائی امن کے قیام میں قبائلی عمائدین کا کردار کلیدی اہمیت رکھتا ہے۔
کمانڈر کوئٹہ کور نے اس موقع پر کہا کہ بلوچستان کی ترقی اور خوشحالی امن اور اتحاد سے مشروط ہے۔ عوام کو دہشت گرد عناصر کے عزائم کو ناکام بنانا ہوگا اور سب کو مل کر ملک دشمن سازشوں کو ناکام کرنا ہے۔
اختتام پر قبائلی عمائدین نے حکومت بلوچستان، پاک فوج اور ایف سی کی جانب سے کیے گئے سیکیورٹی اقدامات خصوصاً دکی کول مائنز اور این-70 پرکو خوش آئند قرار دیا۔ انہوں نے اس عزم کا اظہار کیا کہ وہ امن، سماجی یکجہتی اور ترقی کے سفر میں ریاستی اداروں کے ساتھ بھرپور تعاون جاری رکھیں گے۔
