کوئٹہ: وزیراعلیٰ بلوچستان میر سرفراز بگٹی کی ٹیم نے لیویز اہلکاروں کے لیے ایک اہم اعلان کیا ہے۔ حکومتی بیان کے مطابق وہ لیویز اہلکار جو پولیس فورس میں شمولیت اختیار کرنے کی خواہش مند نہیں ہیں، انہیں زبردستی شامل نہیں کیا جائے گا۔
اعلان میں کہا گیا ہے کہ ایسے تمام لیویز اہلکار اپنی موجودہ مراعات، تنخواہیں اور دیگر سہولیات کے ساتھ فورس سے علیحدگی اختیار کر سکتے ہیں۔ حکومت بلوچستان نے ان کے لیے “گولڈن ہینڈ شیک” پیکیج متعارف کرانے کا فیصلہ کیا ہے تاکہ انہیں مالی معاونت فراہم کی جا سکے۔
ترجمان کے مطابق اس اقدام کا مقصد اصلاحاتی عمل کو رضاکارانہ بنیادوں پر آگے بڑھانا ہے، تاکہ پولیس فورس میں صرف وہی اہلکار شامل ہوں جو جذبۂ خدمت اور پیشہ ورانہ ذمہ داریوں پر یقین رکھتے ہیں۔
وزیراعلیٰ میر سرفراز بگٹی نے واضح کیا کہ حکومت لیویز اہلکاروں کے فیصلے کا احترام کرتی ہے اور کسی پر دباؤ نہیں ڈالا جائے گا۔ انہوں نے کہا کہ اس پالیسی سے فورس میں نظم و ضبط اور کارکردگی بہتر ہوگی۔
اعلان کے بعد لیویز اہلکاروں میں اس فیصلے کو لے کر ملا جلا ردعمل سامنے آیا ہے، بعض نے اسے مثبت قدم قرار دیا جبکہ کچھ نے اس پر مزید وضاحت کا مطالبہ کیا۔
