راولپنڈی، 9 ستمبر 2025 – میجر عدنان اسلم شہید (عمر 31 سال، رہائشی راولپنڈی) کی نماز جنازہ پیر کے روز چکلالہ گیریژن میں ادا کی گئی۔ وہ 2 ستمبر کو بنوں میں دہشت گردوں کے خلاف کارروائی کے دوران شدید زخمی ہوئے تھے اور بعدازاں علاج کے دوران کومبائنڈ ملٹری اسپتال میں شہادت کے رتبے پر فائز ہوئے۔
نماز جنازہ میں وزیراعظم محمد شہباز شریف، وزیر دفاع، وزیر اطلاعات، فیلڈ مارشل سید عاصم منیر (نشان امتیاز ملٹری، ہلالِ جرأت) چیف آف آرمی اسٹاف، اعلیٰ فوجی و سول حکام اور شہید کے اہلخانہ نے شرکت کی۔
میجر عدنان اسلم نے بہادری کی بے مثال داستان رقم کرتے ہوئے اپنے جوانوں کی قیادت کی اور بنوں میں "بھارتی ایجنٹ دہشت گرد گروہ فتنہ الخوارج” کے بزدلانہ حملے کا ڈٹ کر مقابلہ کیا۔
وزیراعظم شہباز شریف نے شہید کو خراج عقیدت پیش کرتے ہوئے کہا:
"آج پاکستان نے اپنے ایک بہادر سپوت کو کھو دیا۔ میجر عدنان کی جرات اور قربانی ہمیشہ قوم کے دلوں میں زندہ رہے گی۔ وہ پاکستان کے بہترین بیٹے ہیں، جن کی پہچان عزم، وطن سے محبت اور قربانی کی لازوال روح ہے۔”
آئی ایس پی آر کے مطابق میجر عدنان اسلم کی شہادت اس عزم کی تجدید ہے کہ پاکستانی افواج ملک سے دہشت گردی کے مکمل خاتمے تک اپنی جدوجہد جاری رکھیں گی۔
شہید کو ان کے آبائی علاقے میں فوجی اعزاز کے ساتھ سپرد خاک کیا جائے گا۔
