پارلیمنٹ ہاؤس اسلام آباد میں منعقد ہونے والے ایک اعلیٰ سطحی اجلاس میں بلوچستان سے متعلق امن و امان، ترقیاتی منصوبوں اور عوامی فلاح و بہبود کے اہم امور پر غور کیا گیا۔
وزیر اعلیٰ بلوچستان میر سرفراز بگٹی نے اسپیکر قومی اسمبلی سردار ایاز صادق سے ملاقات کی، جس میں نائب وزیر اعظم و وزیر خارجہ اسحاق ڈار اور گورنر بلوچستان شیخ جعفر خان مندوخیل بھی شریک تھے۔
ملاقات کے دوران وزیر اعلیٰ بلوچستان نے صوبے کی موجودہ امن و امان کی صورتحال، جاری اور مجوزہ فلاحی و ترقیاتی منصوبوں، ترقیاتی ترجیحات اور وفاق و صوبے کے درمیان مؤثر رابطہ کاری کی ضرورت پر تفصیلی بریفنگ دی۔ انہوں نے اس بات پر زور دیا کہ بلوچستان کی پائیدار ترقی، سماجی ہم آہنگی اور عوامی خوشحالی کے لیے ادارہ جاتی تعاون ناگزیر ہے۔
اسپیکر قومی اسمبلی سردار ایاز صادق نے بلوچستان میں خواتین اور نوجوانوں کے حقوق کے تحفظ، سماجی ترقی اور انسانی وسائل کی بہتری پر خصوصی توجہ دینے کی ضرورت پر زور دیا۔ انہوں نے کہا کہ بلوچستان پاکستان کی مجموعی ترقی میں کلیدی حیثیت رکھتا ہے اور صوبے کو درپیش مسائل کا حل حکومت کی اولین ترجیحات میں شامل ہے۔
نائب وزیر اعظم و وزیر خارجہ اسحاق ڈار نے کہا کہ وفاقی حکومت بلوچستان میں انفراسٹرکچر، تعلیم اور صحت کے شعبوں میں منصوبوں کے بروقت، شفاف اور مؤثر نفاذ کو انتہائی اہمیت دے رہی ہے۔ انہوں نے صوبائی حکومت کے ساتھ مکمل تعاون جاری رکھنے کے عزم کا اعادہ کیا اور بلوچستان کے عوام کی فلاح و بہبود کو قومی ترجیح قرار دیا۔
اجلاس میں اس بات پر اتفاق کیا گیا کہ پارلیمنٹ، وفاقی حکومت اور صوبائی حکومت کی مشترکہ کوششوں سے بلوچستان میں پائیدار ترقی، معاشی استحکام اور سماجی خوشحالی کو یقینی بنایا جائے گا۔
اسپیکر قومی اسمبلی نے کہا کہ بلوچستان ان کے دل کے قریب ہے اور صوبے کو درپیش مسائل کے حل کے لیے تمام دستیاب وسائل بروئے کار لائے جائیں گے۔
شرکاء نے صوبے میں امن و امان کے قیام کے لیے سیکیورٹی فورسز اور قانون نافذ کرنے والے اداروں کی مؤثر کارروائیوں، پیشہ ورانہ خدمات اور قربانیوں کو سراہا۔ اس موقع پر وفاقی اور صوبائی جمہوری اداروں کے درمیان روابط کو مزید مضبوط بنانے میں اسپیکر قومی اسمبلی کے کردار کی بھی تعریف کی گئی۔
اجلاس کے اختتام پر وفاق اور بلوچستان کے درمیان تعاون کو مزید مستحکم کرنے، مشترکہ ترقیاتی اہداف کے حصول اور عوامی فلاح کے منصوبوں پر قریبی رابطے برقرار رکھنے پر اتفاق کیا گیا۔
