نیوز ڈیسک : اسلام آباد: وفاقی دارالحکومت اسلام آباد میں 24 گھنٹوں کے دوران دوسرا زلزلہ محسوس کیا گیا، جس کی شدت ریکٹر اسکیل پر 4.3 ریکارڈ کی گئی۔ زلزلے کے جھٹکوں کے باعث شہریوں میں خوف و ہراس پھیل گیا، اور لوگ اپنے گھروں اور دفاتر سے باہر نکل کر کھلے میدانوں کی طرف دوڑ پڑے۔
زلزلے کی شدت اگرچہ معمولی تھی، تاہم یہ پچھلے 24 گھنٹوں کے دوران دوسرا جھٹکا ہے، جس کے باعث شہریوں میں شدید تشویش پائی جاتی ہے۔ محکمہ موسمیات کے مطابق زلزلے کا مرکز قریبی پہاڑی علاقوں میں تھا اور اس کی گہرائی زمین میں 10 کلومیٹر تھی۔
تاحال کسی جانی یا مالی نقصان کی اطلاع موصول نہیں ہوئی ہے، تاہم ماہرین کا کہنا ہے کہ مسلسل جھٹکوں کا آنا خطرے کی علامت ہو سکتی ہے۔ شہریوں کو محتاط رہنے اور ایمرجنسی ہدایات پر عمل کرنے کی اپیل کی گئی ہے۔
ریسکیو ادارے اور ضلعی انتظامیہ صورتحال پر نظر رکھے ہوئے ہیں جبکہ متعلقہ اداروں نے الرٹ جاری کر دیا ہے
