منان مندوخیل
کوئٹہ، وزیر اعلیٰ بلوچستان میر سرفراز بگٹی کی زیر صدارت ایک اہم اجلاس میں صوبے بھر میں زکوٰۃ کے نظام کو جدید خطوط پر استوار کرنے اور ڈیجیٹلائزڈ کرنے کا فیصلہ کیا گیا ہے، جس کا مقصد زکوٰۃ کی رقوم کو شفاف، منصفانہ اور براہ راست مستحقین تک پہنچانا ہے۔
اجلاس کی صدارت وزیر اعلیٰ نے کی:
یہ اجلاس جمعرات کو چیف منسٹر سیکرٹریٹ کوئٹہ میں منعقد ہوا، جس میں زکوٰۃ و اوقاف کے نظام کی تنظیمِ نو سے متعلق مختلف امور پر غور کیا گیا۔ اجلاس میں فیصلہ کیا گیا کہ پورے بلوچستان میں زکوٰۃ کی تقسیم کو ڈیجیٹل طریقے سے انجام دیا جائے گا، تاکہ مستحق افراد کو براہِ راست ان کے ڈیجیٹل بینک اکاؤنٹس میں رقوم منتقل کی جاسکیں۔
شفافیت اور میرٹ پر زور:
وزیر اعلیٰ میر سرفراز بگٹی نے اجلاس سے خطاب کرتے ہوئے کہا کہ زکوٰۃ کے فنڈز کی شفاف اور مؤثر ترسیل کے لیے بینظیر انکم سپورٹ پروگرام (BISP) کی معاونت حاصل کی جائے گی۔ انہوں نے کہا کہ مستحقین کی درست شناخت کے لیے نادرا کا ڈیٹا اور جدید ڈیجیٹل سسٹمز استعمال کیے جائیں گے، تاکہ کرپشن، بدعنوانی اور بے ضابطگیوں کا خاتمہ ممکن ہو۔
ڈیجیٹل نظام سے عوام کا اعتماد بحال ہوگا:
وزیر اعلیٰ نے مزید کہا کہ ڈیجیٹل زکوٰۃ نظام کے نفاذ سے عوام کا اعتماد بحال ہوگا اور حقیقی مستحقین براہ راست مستفید ہوں گے۔ انہوں نے کہا کہ حکومت کی اولین ترجیح شفافیت، میرٹ اور معاشرتی انصاف کو فروغ دینا ہے تاکہ صوبے کے غریب اور نادار طبقات کو ریلیف فراہم کیا جا سکے۔
اعلیٰ سطحی حکام کی شرکت:
اجلاس میں صوبائی وزیر میر محمد صادق عمرانی، پارلیمانی سیکرٹری برائے زکوٰۃ محترمہ شہناز عمرانی، پرنسپل سیکرٹری بابر خان، سیکرٹری زکوٰۃ و اوقاف محمد اسحاق جمالی، سیکرٹری خزانہ عمران زرکون، اور ایڈیشنل سیکرٹری محمد فریدون نے شرکت کی۔
