کوئٹہ، 4 ستمبر 2025 – وزیر اعلیٰ بلوچستان میر سر فراز بگٹی نے کہا ہے کہ صوبے میں بیروزگاری ایک بڑا چیلنج ہے اور اس مسئلے سے نمٹنے کے لیے نجی شعبے میں زیادہ سے زیادہ روزگار کے مواقع پیدا کرنا ہوں گے۔ انہوں نے کہا کہ بلوچستان کے نوجوان ہمارا سب سے قیمتی سرمایہ ہیں اور صوبائی حکومت ان کے روشن مستقبل کے لیے تعلیم، ہنرمندی اور روزگار کی فراہمی کو یقینی بنائے گی۔
وزیر اعلیٰ نے یہ بات جمعرات کو چیف منسٹر سیکرٹریٹ کوئٹہ میں منعقدہ اجلاس کی صدارت کرتے ہوئے کہی جس میں یوتھ اسکلز ڈویلپمنٹ پروگرام کا جائزہ لیا گیا۔ انہوں نے کہا کہ "اسمگلنگ اور غیر قانونی کاروبار نوجوانوں کا مستقبل نہیں، ہم انہیں تعلیم اور ہنر کے ذریعے باعزت روزگار دینا چاہتے ہیں۔”
اجلاس میں وزیر اعلیٰ کے مشیر برائے محنت و افرادی قوت سردار غلام رسول عمرانی، چیف سیکرٹری شکیل قادر خان، پرنسپل سیکرٹری بابر خان، سیکرٹری لیبر نیاز نیچاری، ڈی جی بی ٹی ای وی ٹی اے طارق جاوید مینگل اور دیگر حکام شریک ہوئے۔
تیس ہزار نوجوانوں کو تربیت دینے کا ہدف
اجلاس کو بتایا گیا کہ یوتھ اسکلز ڈویلپمنٹ پروگرام کے تحت 30 ہزار نوجوانوں کو مختلف شعبوں میں تربیت فراہم کی جائے گی۔ مستند اداروں کی معاونت سے نوجوانوں کو جدید اور مارکیٹ کے مطابق ہنر سکھائے جائیں گے تاکہ وہ مقامی اور بین الاقوامی سطح پر بہتر روزگار حاصل کرسکیں۔
بارڈر اضلاع کے نوجوانوں کے لیے خصوصی ترجیح
وزیر اعلیٰ نے کہا کہ بارڈر اضلاع کے نوجوانوں کو اس پروگرام اور بلاسود قرضہ اسکیم میں خصوصی ترجیح دی جائے گی تاکہ وہ اسمگلنگ اور غیر قانونی دھندوں سے نکل کر محفوظ اور باعزت روزگار کی طرف آئیں۔
حکومت کی اولین ترجیح: تعلیم اور روزگار
وزیر اعلیٰ نے ہدایت کی کہ پروگرام کے دوران مکمل شفافیت اور میرٹ کو یقینی بنایا جائے۔ انہوں نے کہا کہ صوبائی حکومت نوجوانوں کے لیے:
تعلیمی وظائف
ہنر مندی کے پروگرام
روزگار کے مواقع
کو اپنی اولین ترجیحات میں شامل کیے ہوئے ہے تاکہ نوجوان بلوچستان اور پاکستان کی ترقی میں بھرپور کردار ادا کرسکیں
