کوئٹہ: وزیر اعلیٰ بلوچستان میر سرفراز بگٹی کی ہدایات پر سیکرٹری مواصلات و تعمیرات بابر خان نے کوئٹہ میں جاری اہم ترقیاتی منصوبوں کا تفصیلی دورہ کیا تاکہ کام کی رفتار میں تیزی اور معیار میں بہتری لائی جا سکے۔
دورے کے دوران سیکرٹری بابر خان نے ریڈ زون، چمن پھاٹک تا کوئلہ پھاٹک، عالمو چوک ایئرپورٹ روڈ اور چشمہ پل منصوبوں پر جاری کام کا جائزہ لیا اور متعلقہ حکام سے پیش رفت کے بارے میں بریفنگ حاصل کی۔ اس موقع پر چیف انجینئر فیڈرل پروجیکٹس ڈاکٹر سجاد بلوچ، ایگزیکٹو انجینئر ای اینڈ ایم ورکس ڈویژن حاجی محمد انور، ایگزیکٹو انجینئر روڈز سریاب ڈویژن حبیب احمد، ایگزیکٹو انجینئر روڈز کچلاک ڈویژن قاضی ثناءاللہ سمیت دیگر افسران بھی موجود تھے۔
ایگزیکٹو انجینئرز نے منصوبوں کی موجودہ پیش رفت، درپیش چیلنجز اور متوقع تکمیل کے اوقات کے حوالے سے تفصیلی بریفنگ دی۔ سیکرٹری بابر خان نے ہدایت کی کہ تمام منصوبوں میں تیزی اور معیار کو یقینی بنایا جائے تاکہ شہریوں کو جلد سہولیات میسر ہو سکیں۔
انہوں نے کہا کہ منصوبوں کی بروقت تکمیل شہر میں ٹریفک کے مسائل کم کرے گی اور شہریوں کو نمایاں ریلیف ملے گا۔ سیکرٹری بابر خان نے اعلان کیا کہ وہ ہر پندرہ روز بعد منصوبوں کا خود دورہ کریں گے اور اگر پیش رفت تسلی بخش نہ ہوئی تو متعلقہ افسران کے خلاف محکمانہ کارروائی کی جائے گی۔
شہری حلقوں نے سیکرٹری کے اس اقدام کو سراہا اور توقع ظاہر کی کہ مسلسل نگرانی سے منصوبوں کی بروقت تکمیل اور شہر کی انفراسٹرکچر میں بہتری ممکن ہوگی۔
