نیوز ڈیسک
اسلام آباد: افغان طالبان حکومت کے خلاف پاک افواج کی حالیہ فیصلہ کن کارروائی کے بعد بھارتی اور افغان میڈیا میں پاکستانی لڑاکا طیارہ گرائے جانے سے متعلق گمراہ کن پروپیگنڈا تیزی سے پھیلایا گیا۔ تاہم وزارتِ اطلاعات و نشریات پاکستان نے ان دعوؤں کو مکمل طور پر بے بنیاد اور من گھڑت قرار دے دیا ہے۔
افغان وزارتِ دفاع کی جانب سے دعویٰ کیا گیا کہ ننگرہار میں افغان فورسز نے ایک پاکستانی لڑاکا طیارہ مار گرایا اور پائلٹ کو زندہ گرفتار کر لیا۔ اس بیان کو بھارتی میڈیا اور بعض افغان سوشل میڈیا اکاؤنٹس نے وسیع پیمانے پر نشر کیا، جس کے بعد خطے میں کشیدگی سے متعلق قیاس آرائیاں شروع ہو گئیں۔
تاہم پاکستانی حکام اور دفاعی ذرائع کے مطابق کسی بھی پاکستانی طیارے کے نقصان یا پائلٹ کی گرفتاری کی کوئی تصدیق موجود نہیں۔ وزارتِ اطلاعات و نشریات پاکستان نے واضح کیا کہ عالمی میڈیا، دفاعی اداروں اور سرکاری چینلز نے بھی ایسے کسی واقعے کی توثیق نہیں کی۔
مزید برآں، افغان سوشل میڈیا پر وائرل کی گئی تصویر کے بارے میں پاکستانی حکام کا کہنا ہے کہ وہ 2021 میں ترکی میں پیش آنے والے ایک روسی طیارے کے حادثے کی پرانی تصویر ہے، جسے موجودہ صورتحال سے جوڑ کر غلط تاثر پیدا کرنے کی کوشش کی گئی۔
دفاعی تجزیہ کاروں اور عالمی ماہرین کے مطابق، یہ منظم منفی مہم خطے میں پاکستان مخالف بیانیے کو تقویت دینے کی کوشش ہے۔ ماہرین کا کہنا ہے کہ سوشل میڈیا پروپیگنڈا، فیک نیوز اور غیر مصدقہ دعوے ہائبرڈ وارفیئر کا حصہ بن چکے ہیں، جن کا مقصد عوامی رائے عامہ کو گمراہ کرنا اور سفارتی سطح پر دباؤ بڑھانا ہوتا ہے۔
تجزیہ کاروں نے اس امر پر بھی تشویش ظاہر کی کہ بعض آفیشل اکاؤنٹس سے پاکستان مخالف دعوے جاری کر کے بعد ازاں حذف کر دینا غیر ذمہ دارانہ طرزِ عمل کی عکاسی کرتا ہے۔ ان کے مطابق زمینی حقائق اور آزاد ذرائع سے تصدیق نہ ہونے کے باعث ایسے دعوؤں کو محض فریب قرار دیا جا رہا ہے۔
