خبر:
کوئٹہ – چیف سیکرٹری بلوچستان شکیل قادر خان نے صوبائی محکموں کو ہدایت کی ہے کہ اسٹریٹجک ترقیاتی منصوبوں پر عملدرآمد کی رفتار تیز کی جائے تاکہ انفراسٹرکچر میں بہتری، عوامی سہولیات کی فراہمی اور طویل المدتی استحکام کو یقینی بنایا جا سکے۔
سیکرٹریز کمیٹی کے اجلاس کی صدارت کرتے ہوئے چیف سیکرٹری نے کہا کہ یہ منصوبے صوبے کی معاشی ترقی میں تیزی لانے اور عوام کے معیارِ زندگی کو بلند کرنے کے لیے نہایت اہم ہیں۔ اجلاس میں سڑکوں کے نیٹ ورک کی توسیع، سولر سسٹمز کی تنصیب، 164 بنیادی صحت مراکز کو فعال کرنے، 1,200 اسکولز کھولنے (جن میں 555 تیار ہیں)، آٹھ شہروں میں سیف سٹی منصوبہ، میٹ پیکیجنگ پلانٹ اور فروٹ و ویجیٹیبل مارکیٹ کا قیام، 3,000 اسکولوں میں اضافی کمروں کی تعمیر، بلدیاتی خدمات کی بہتری، صاف پانی کی فراہمی اور شہری ترقی کے منصوبوں پر خصوصی توجہ دینے کا فیصلہ کیا گیا۔
چیف سیکرٹری نے تمام افسران کو اپنی جائے تعیناتی پر موجود رہنے کی ہدایت کی تاکہ عوامی مسائل فوری حل ہو سکیں۔ اجلاس میں ترقیاتی منصوبوں کی بروقت تکمیل اور عوام کو حکومت کی جانب سے بہتر خدمات فراہم کرنے کے اقدامات پر بھی غور کیا گیا۔
اجلاس میں سینئر ممبر بورڈ آف ریونیو قمبر دشتی، چیئرمین سی ایم آئی ٹی محمد علی کاکڑ، ایڈیشنل چیف سیکرٹری ترقیات زاہد سلیم، ایڈیشنل چیف سیکرٹری داخلہ حمزہ شفقات اور تمام صوبائی سیکرٹریز نے شرکت کی۔
