نمائندہ خصوصی :ڈیرہ مراد جمالی — بلوچستان کے ضلع نصیرآباد میں نامعلوم افراد کی جانب سے نیشنل ہائی وے پولیس کی گاڑی کو نشانہ بنایا گیا، جس کے نتیجے میں تین اہلکار زخمی ہو گئے۔
پولیس حکام کے مطابق یہ دھماکہ ریموٹ کنٹرول بم (IED) کے ذریعے کیا گیا، جسے سڑک کے کنارے نصب کیا گیا تھا۔ دھماکے کے نتیجے میں پولیس کی گاڑی کو بھی نقصان پہنچا، جبکہ زخمی اہلکاروں کو فوری طور پر ڈسٹرکٹ ہیڈ کوارٹر اسپتال نصیرآباد منتقل کیا گیا، جہاں ہنگامی حالت نافذ کر دی گئی۔
اسپتال انتظامیہ کے مطابق زخمیوں کو فوری طبی امداد فراہم کی گئی، اور ان کی حالت خطرے سے باہر بتائی جا رہی ہے۔
واقعے کے بعد پولیس اور قانون نافذ کرنے والے اداروں نے علاقے کو گھیرے میں لے کر تحقیقات کا آغاز کر دیا ہے۔ سرچ آپریشن بھی شروع کر دیا گیا ہے تاہم تاحال کسی گروہ نے حملے کی ذمہ داری قبول نہیں کی۔
بلوچستان کے مختلف علاقوں میں اس نوعیت کے حملے سیکیورٹی فورسز کو نشانہ بنانے کے لیے کیے جاتے رہے ہیں، جن کا مقصد امن و امان کی صورتحال کو خراب کرنا ہے۔
