سید علی شاہ ، نیوز ڈیسک :
کوئٹہ – بلوچستان بورڈ آف انٹرمیڈیٹ اینڈ سیکنڈری ایجوکیشن (BBISE) کوئٹہ میں شدید انتظامی بحران پیدا ہو گیا ہے، جہاں چیئرمین اور کنٹرولر امتحانات کے درمیان لفظی جنگ اور الزامات کا سلسلہ سوشل میڈیا پر زیر گردش ہے۔ دو اہم افسران کے درمیان یہ کشمکش نہ صرف ادارے کی ساکھ کو متاثر کر رہی ہے بلکہ ہزاروں طلبہ کے تعلیمی مستقبل پر بھی سوالیہ نشان لگا رہی ہے۔
4 جولائی 2025 کو چیئرمین BBISE کی جانب سے جاری کردہ ایک سرکاری مراسلے میں محترمہ عابدہ کاکڑ، کنٹرولر امتحانات، پر الزامات عائد کیے گئے ہیں کہ امتحانی پرچے امتحانی مرکز سے باہر لے جائے گئے، جب کہ وہ خود امین آباد گرلز اسکول کوئٹہ میں موجود تھیں۔ شکایت کنندہ کی جانب سے مبینہ ثبوت کے طور پر تصاویر بھی فراہم کی گئی ہیں۔ چیئرمین نے اسکول ڈیپارٹمنٹ سے باقاعدہ کارروائی یا معاملہ وزیراعلیٰ کی انسپیکشن ٹیم کو بھیجنے کی درخواست کی ہے۔
اس کے جواب میں، 30 جون 2025 کو کنٹرولر امتحانات کے دفتر سے جاری کردہ ایک مراسلے میں مؤقف اختیار کیا گیا ہے کہ چیئرمین کے دفتر نے نتائج کی تیاری کا عمل غیر قانونی طور پر اپنے ہاتھ میں لے لیا ہے اور کنٹرولر کو تمام اختیارات، ڈیٹا اور فیصلوں سے مکمل طور پر محروم کر دیا گیا ہے۔ یہاں تک کہ IT ڈیپارٹمنٹ کے عملے کو مبینہ طور پر دھمکی دی گئی کہ اگر انہوں نے کنٹرولر سے تعاون کیا تو ان کی نوکری خطرے میں ہوگی۔
کنٹرولر نے دعویٰ کیا کہ انہوں نے چیئرمین سے فون پر رابطہ کرکے اپنی تشویش کا اظہار کیا، لیکن چیئرمین نے مبینہ طور پر کہا کہ “نتائج کے معاملات میں میرا کوئی کردار نہیں”۔ اس کے باوجود، تمام نتائج کی تیاری کا عمل چیئرمین کے دفتر کے ذریعے جاری ہے۔
یہ اندرونی کشمکش BBISE جیسے اہم تعلیمی ادارے کی ساکھ کو نقصان پہنچا رہی ہے اور طلبہ کے نتائج، داخلوں اور مستقبل کے منصوبوں کو غیر یقینی صورتحال میں دھکیل رہی ہے۔ ماہرین تعلیم اور والدین نے صوبائی حکومت سے مطالبہ کیا ہے کہ وہ فوری طور پر مداخلت کرے اور ادارے میں شفافیت اور نظم و ضبط بحال کرے۔
