نیوز ڈیسک
کوئٹہ: حکومتِ بلوچستان نے گندم کی مبینہ خردبرد اور کرپشن کے ایک بڑے کیس میں محکمہ خوراک کے سابق ڈائریکٹر جنرل (ڈی جی) کی گرفتاری کا حکم دے دیا ہے۔
حکام کے مطابق اینٹی کرپشن اسٹیبلشمنٹ (ACE) کو بلوچستان انکوائریز اینڈ اینٹی کرپشن رولز 2011 کے تحت کارروائی کی ہدایت جاری کی گئی ہے۔ سابق ڈی جی جلال کاکڑ اور ڈائریکٹر مانیٹرنگ محمد رحیم پر مالی بے ضابطگیوں، بدعنوانی اور گندم کی تقسیم میں خردبرد کے الزامات عائد کیے گئے ہیں۔
ذرائع کا کہنا ہے کہ ملزمان پر سرکاری گندم کے ذخائر میں مبینہ خردبرد اور قومی خزانے کو نقصان پہنچانے کا الزام ہے۔ حکام کے مطابق کیس کی تحقیقات جاری ہیں اور مزید گرفتاریوں کا بھی امکان ہے۔
یہ معاملہ بلوچستان میں گندم کی خریداری اور تقسیم کے نظام میں شفافیت اور نگرانی پر سنگین سوالات اٹھا رہا ہے۔
