سٹاف رپورٹر:
وزیر اعلیٰ بلوچستان میر سرفراز بگٹی نے کہا ہے کہ صوبے کے صحافی مشکل حالات میں اپنا فرض ادا کر رہے ہیں اور حکومت ان کے حالات اور مالی مشکلات سے بخوبی آگاہ ہے، کیونکہ بہت سے میڈیا ورکرز محدود تنخواہوں پر گزارہ کر رہے ہیں۔ اسی پیش نظر صوبائی حکومت نے صحافیوں کے لیے جامع ہاؤسنگ اسکیم کے قیام کا فیصلہ کیا ہے۔ اس منصوبے کے لیے زمین پہلے ہی مختص کر دی گئی ہے اور توقع ہے کہ ایک سال کے اندر یہ مکمل ہو کر فلیٹس صحافیوں کے حوالے کر دیے جائیں گے۔
افتتاحی تقریب سے خطاب کرتے ہوئے وزیر اعلیٰ نے کہا کہ پاکستان کے استحکام کے لیے ذمہ دار اور سچی صحافت کی ضرورت ہے۔ آزاد صحافت معاشرے کے لیے ریڑھ کی ہڈی کی حیثیت رکھتی ہے، اور بلوچستان کے صحافی ہمیشہ اس ذمہ داری کو نبھاتے آئے ہیں۔ انہوں نے مزید کہا کہ اختلاف رائے جائز ہے اور تنقید برداشت کرنے کے لیے ہوتی ہے، اور حکومت نے ہمیشہ صحافیوں کی رائے کا احترام کیا ہے۔
وزیر اعلیٰ نے کہا کہ آج لوگ پرنٹ اور الیکٹرانک میڈیا کی طرف واپس آ رہے ہیں، لیکن سوشل میڈیا بھی ایک حقیقت ہے۔ صحافیوں کو چاہیے کہ وہ ڈیجیٹل میڈیا پر بھی توجہ دیں اور سچائی کو فروغ دیں۔ انہوں نے بتایا کہ حکومت نے فیصلہ کیا ہے کہ صحافیوں کو صرف زمین نہیں بلکہ تیار فلیٹس بھی فراہم کیے جائیں گے۔
بلوچستان کے صحافیوں کے لیے احترام و تعاون کی روایت طویل ہے، اور حکومت ان کی فلاح و بہبود کے لیے ہر ممکن اقدامات کرے گی۔ وزیر اعلیٰ نے اعلان کیا کہ کم تنخواہوں پر کام کرنے والے اور شہید ہونے والے صحافیوں کو بلا معاوضہ فلیٹس فراہم کیے جائیں گے۔ شہداء صحافیوں کے بچوں کو مفت تعلیم دی جائے گی، چاہے وہ ملکی یا بین الاقوامی اداروں میں تعلیم حاصل کریں، اور تمام تعلیمی اخراجات حکومت برداشت کرے گی۔
فلیٹس کی تقسیم میں میرٹ کو اولین ترجیح دی جائے گی۔ غریب میڈیا ورکرز کو قرعہ اندازی کے ذریعے مفت اور دیگر کو نصف قیمت پر آسان اقساط میں فلیٹس دیے جائیں گے۔ وزیر اعلیٰ نے متعلقہ حکام کو ہدایت دی کہ ہاؤسنگ اسکیم پر فوری کام شروع کیا جائے اور منصوبہ اعلیٰ معیار کے مطابق مکمل کیا جائے۔
اپنے خطاب میں وزیر اعلیٰ نے کہا کہ ریاست مخالف تنظیمیں کبھی کبھار نوجوانوں کو اغوا کر کے بھاری تاوان کا مطالبہ کرتی ہیں، اور بعض معاملات کی رپورٹنگ سے صحافیوں کو جان کا خطرہ ہوتا ہے۔ انہوں نے اپنے سیاسی موقف اور پاکستان کے ساتھ وابستگی کا اعادہ کرتے ہوئے کہا کہ مظلوم کے ساتھ ہمیشہ کھڑے رہیں گے اور ظالم کے ساتھ نہیں ہوں گے۔
وزیر اعلیٰ نے صحافیوں سے کہا کہ یہ ہاؤسنگ اسکیم ان کا حق ہے اور اسے کسی احسان کے طور پر نہ دیکھیں۔ انہوں نے صحافیوں پر زور دیا کہ سچائی کو فروغ دیں اور بلیک میلنگ کی حوصلہ شکنی کریں۔
تقریب کے آخر میں وزیر اعلیٰ نے جرنلسٹ ہاؤسنگ سوسائٹی کے کاغذات صدر پریس کلب عرفان سعید اور سینئر صحافیوں کے حوالے کیے۔ پریس کلب کے صدر عرفان سعید نے صوبائی حکومت کے اس اقدام کو صحافی برادری کے مسائل کے مستقل حل کی طرف اہم قدم قرار دیا اور کہا کہ موجودہ وزیر اعلیٰ نے عملی اقدامات کر کے صحافیوں کے دیرینہ خواب کو حقیقت کا رنگ دیا ہے۔ تقریب میں صوبائی وزراء، سیکرٹریز، کمشنر، ڈپٹی کمشنر اور سینئر صحافیوں سمیت بڑی تعداد میں میڈیا ورکرز نے شرکت کی
