کوئٹہ (یکم اکتوبر 2025): بلوچستان ہائی کورٹ نے صوبائی کابینہ کا وہ فیصلہ معطل کر دیا جس کے تحت ڈپٹی کمشنرز، ایڈیشنل ڈپٹی کمشنرز اور اسسٹنٹ کمشنرز کو مجسٹریٹ فرسٹ کلاس کے اختیارات دیے گئے تھے۔
چیف جسٹس بلوچستان ہائی کورٹ جسٹس روزی خان بڑیچ اور جسٹس سردار احمد حلیمی پر مشتمل دو رکنی بینچ نے یہ حکم آئینی درخواست گزار افتخار احمد لانگو کی پٹیشن پر سماعت کے دوران جاری کیا۔
درخواست گزار نے مؤقف اختیار کیا کہ ایگزیکٹو افسران کو عدالتی اختیارات دینا آئین و قانون کی خلاف ورزی ہے۔ عدالت نے قرار دیا کہ صوبائی کابینہ کو ایسے اختیارات دینے کا کوئی اختیار نہیں اور یہ فیصلہ ابتدا ہی سے غیر قانونی ہے۔
عدالت عالیہ نے صوبائی حکومت، ایڈووکیٹ جنرل بلوچستان اور دیگر فریقین کو نوٹسز جاری کرتے ہوئے جواب طلب کیا۔
مزید سماعت تک صوبائی کابینہ کے 24 ستمبر 2025 کے فیصلے پر عمل درآمد روک دیا گیا ہے۔
