کوئٹہ: وزیر اعلیٰ بلوچستان میر سرفراز بگٹی نے پیر کے روز مائنز اونرز ایسوسی ایشن کے نمائندہ وفد سے ملاقات کی اور صوبائی حکومت کے اس تاریخی فیصلے کو سراہا گیا جس کے تحت کان کنی کے شعبے کو صنعت کا درجہ دیا گیا۔ وفد نے اس اقدام کو صوبے کی معاشی ترقی، سرمایہ کاری اور روزگار کے مواقع کے لیے ایک اہم قدم قرار دیا۔
ملاقات کے دوران چیمبر آف مائنز کے قیام، اراضی کی فراہمی، سرمایہ کاری کے مواقع اور مائننگ سیکٹر میں موجود چیلنجز پر تفصیلی بات چیت ہوئی۔
وزیر اعلیٰ بگٹی نے کہا کہ یہ اقدام نہ صرف ورکرز کے لیے بہتر تحفظ اور فلاحی سہولیات فراہم کرے گا بلکہ سرمایہ کاروں کے لیے بھی شفاف اور مضبوط پالیسی فریم ورک مہیا کرے گا۔ انہوں نے کہا کہ بلوچستان کی ترقی میں کان کنی کا شعبہ بنیادی ستون ہے اور حکومت شفافیت، جدید ٹیکنالوجی اور بین الاقوامی معیار کے مطابق نگرانی کا نظام متعارف کرا رہی ہے۔
انہوں نے مزدوروں کی محفوظ ورکنگ کنڈیشنز، صحت و سلامتی، اور ریسکیو میکانزم کی بہتری پر بھی زور دیا اور غیر قانونی کان کنی روکنے اور مائننگ لیز کے نظام کو شفاف بنانے کے لیے جامع حکمت عملی پر کام جاری ہونے کی اطلاع دی۔
وفد نے صوبائی حکومت کے اقدامات، بشمول چمالنگ اور دکی میں ورکرز کے لیے ریسکیو سینٹرز اور شعبے میں اصلاحات کو سراہا اور وزیر اعلیٰ کا شکریہ ادا کیا۔ وفد نے کہا کہ یہ پالیسیز مائننگ سیکٹر میں سرمایہ کاری اور اعتماد بڑھانے میں مددگار ثابت ہوں گی۔
ملاقات میں صوبائی وزیر میر شعیب نوشیروانی، رکن صوبائی اسمبلی پرنس آغا عمر احمد زئی، اے سی ایس داخلہ، سیکرٹری مائنز، ڈی جی مائنز اور دیگر حکام بھی موجود تھے۔
