کوئٹہ (22 اپریل) نیوز ڈیسک : وزیر اعلیٰ بلوچستان میر سرفراز بگٹی نے سریاب میں تین ترقیاتی منصوبوں کا افتتاح کیا، جو کوئٹہ ڈویلپمنٹ پروجیکٹ کے تحت مکمل کیے گئے۔ پی ڈی رفیق بلوچ نے منصوبوں پر بریفنگ دی۔ وزیر اعلیٰ نے کہا کہ حکومت شہر کی خوبصورتی کے لیے پرعزم ہے اور شہریوں کو بھی اپنا کردار ادا کرنا ہوگا۔
انہوں نے وال چاکنگ پر شدید ردعمل دیتے ہوئے کہا کہ اب اس کے خلاف قانون حرکت میں آئے گا اور ذمہ دار افراد کے خلاف کارروائی ہوگی۔ وزیر اعلیٰ نے سریاب کے عوام کی جانب سے منصوبوں کا خیال رکھنے کو خوش آئند قرار دیا۔
انہوں نے بتایا کہ ائیرپورٹ روڈ کو بھی خوبصورت بنایا جا رہا ہے اور اربن ڈویلپمنٹ کے منصوبوں پر عمل درآمد ایک مشکل کام ہے۔ پروجیکٹ ڈائریکٹر، ان کی ٹیم اور کمشنر کوئٹہ ڈویژن کی کاوشوں کو سراہتے ہوئے وزیر اعلیٰ نے انہیں مبارکباد دی۔
