نیوز ڈیسک: کابینہ اجلاس کے بعد میڈیا کو بریفنگ دیتے ہوئے شاہد رند نے کہا کہ بلوچستان کابینہ نے صوبے میں غذائی تحفظ کو یقینی بنانے کے لیے 0.50 ملین میٹرک ٹن گندم کی خریداری کی منظوری دے دی ہے۔ انہوں نے بتایا کہ سرکاری گندم کے نظام میں بے ضابطگیوں پر کابینہ نے سخت نوٹس لیا اور معاملے کی تحقیقات کے لیے پارلیمانی سب کمیٹی قائم کرنے کا فیصلہ کیا گیا ہے، جبکہ بدعنوانی میں ملوث تمام اہلکاروں کے خلاف بلاامتیاز کارروائی کی واضح ہدایات جاری کی گئی ہیں۔
انہوں نے کہا کہ صوبائی کابینہ کا 23واں اجلاس، جس کی صدارت میر سرفراز بگٹی نے کی، میں امن و امان کی مجموعی صورتحال کا جائزہ لیا گیا۔ اجلاس میں 31 جنوری کو پیش آنے والے دہشت گردی کے واقعات کی شدید مذمت کی گئی، شہداء کو خراجِ عقیدت پیش کیا گیا اور متاثرہ خاندانوں سے یکجہتی کا اظہار کیا گیا۔ کابینہ نے سیکیورٹی فورسز کے ساتھ مل کر صوبے سے دہشت گردی کے مکمل خاتمے کے عزم کا اعادہ کیا۔
شاہد رند نے بتایا کہ کابینہ نے کلائمیٹ اسمارٹ ایگریکلچر منصوبے کی منظوری دی ہے، جس کا مقصد پانی کے مؤثر استعمال کو فروغ دینا اور زرعی پیداوار میں اضافہ کرنا ہے۔ اس کے علاوہ بلوچستان لینڈ لیز پالیسی 2026 کی بھی منظوری دی گئی، جس سے سرمایہ کاری کو فروغ اور روزگار کے نئے مواقع پیدا ہونے کی توقع ہے۔
انہوں نے کہا کہ بلوچستان ڈیولپمنٹ اتھارٹی کے ملازمین کی تنخواہوں کی ادائیگی کے لیے فنڈز کی منظوری دی گئی ہے، جبکہ خودمختار اداروں کی کارکردگی اور احتساب کو بہتر بنانے کے لیے ان کی تنظیم نو کا فیصلہ بھی کیا گیا ہے۔
اجلاس میں بلوچستان پبلک پرائیویٹ پارٹنرشپ ایکٹ 2025 اور لیویز فورس ترمیمی بل 2025 کی منظوری بھی دی گئی۔ قومی شاہراہوں پر سیکیورٹی کو مزید مؤثر بنانے کے لیے بلوچستان پولیس کو ہدایات جاری کی گئیں اور انسپکٹر جنرل پولیس کو سات روز کے اندر تفصیلی رپورٹ پیش کرنے کا حکم دیا گیا۔
بریفنگ کے اختتام پر شاہد رند نے کہا کہ صوبائی حکومت بلوچستان میں امن، معاشی استحکام اور ادارہ جاتی اصلاحات کے لیے عملی اور مؤثر اقدامات کا سلسلہ جاری رکھے گی۔
