نیوز ڈیسک:
کوئٹہ میں وزیراعلیٰ سیکرٹریٹ میں بلوچستان کی سیاسی قیادت کا اعلیٰ سطحی اجلاس منعقد ہوا، جس میں صوبائی حکومت کے سینئر حکام اور تمام اتحادی جماعتوں کے نمائندوں نے شرکت کی۔ اجلاس میں صوبے کی سیاسی صورتحال، امن و امان اور ترقیاتی ایجنڈے کا تفصیلی جائزہ لیا گیا، جبکہ اتحادی جماعتوں نے حکومت پر مکمل اعتماد کا اظہار کیا۔
اجلاس میں گورنر بلوچستان شیخ جعفر خان مندوخیل، وزیراعلیٰ میر سرفراز بگٹی، اسپیکر عبدالخالق اچکزئی اور ڈپٹی اسپیکر غزالہ گولا نے شرکت کی۔ سیاسی رہنماؤں میں مسلم لیگ (ن) کے پارلیمانی لیڈر میر سلیم خان کھوسہ، پیپلز پارٹی بلوچستان کے صدر سردار عمر گورگیج، بی اے پی کے پارلیمانی لیڈر نوابزادہ طارق مگسی، میر صادق سنجرانی اور اے این پی کے رہنما انجینئر زمراک خان اچکزئی شامل تھے۔
اجلاس میں صوبے کی مجموعی سیاسی فضا، ترقیاتی منصوبوں کی پیشرفت اور امن و امان کو مضبوط بنانے کے اقدامات کا جائزہ لیا گیا۔ اتحادی جماعتوں نے حکومتی کارکردگی پر اطمینان کا اظہار کرتے ہوئے صوبے کی استحکام کے لیے باہمی اتحاد کے عزم کو دہرایا۔
شرکاء نے امن و امان میں مزید بہتری کے لیے تجاویز بھی پیش کیں اور ترقیاتی منصوبوں کو تیز کرنے کے لیے مشترکہ حکمتِ عملی پر اتفاق کیا۔ فیصلہ کیا گیا کہ آئندہ تمام ترقیاتی اور فلاحی منصوبے عوامی ضرورتوں کے مطابق ترتیب دیے جائیں گے تاکہ ان کے ثمرات براہ راست عوام تک پہنچ سکیں۔
وزیراعلیٰ میر سرفراز بگٹی نے اجلاس سے خطاب میں کہا کہ سیاسی اتحاد اور مضبوط پارلیمانی ہم آہنگی بلوچستان کے بہتر مستقبل کی ضمانت ہے۔ انہوں نے کہا، ’’تمام اتحادی جماعتیں بلوچستان کی ترقی اور امن کے لیے متحد ہیں، اور یہی ہمارا اصل سرمایہ ہے۔‘‘
گورنر بلوچستان شیخ جعفر خان مندوخیل نے اس موقع پر کہا کہ امن و ترقی پر سیاسی اتفاقِ رائے صوبے میں مثبت اور مستحکم سیاسی ماحول کی عکاسی کرتا ہے، جو حکومت کی سمت پر عوامی اعتماد کو مزید مضبوط بناتا ہے۔
