داؤد احمد:
اسلام آباد — اسپیکر قومی اسمبلی سردار ایاز صادق نے واضح کیا ہے کہ بلوچستان کے وزیر اعلیٰ میر سرفراز احمد بگٹی کو تبدیل کیے جانے کی اطلاعات بے بنیاد ہیں اور اس حوالے سے پھیلائی جانے والی افواہوں میں کوئی حقیقت نہیں۔
انہوں نے کہا کہ بلوچستان کی ترقی، خوشحالی اور سیاسی استحکام کے لیے صوبے میں قائم اتحادی حکومت اپنا موثر کردار ادا کرتی رہے گی۔ ان کا کہنا تھا کہ وفاق اور صوبوں کے درمیان رابطوں میں اضافہ عوامی مسائل کے حل میں اہم کردار ادا کرتا ہے۔
یہ بات انہوں نے وزیر اعلیٰ بلوچستان میر سرفراز احمد بگٹی سے ملاقات کے دوران کہی، جو گزشتہ روز پارلیمنٹ ہاؤس میں اسپیکر سے ملنے پہنچے۔ ملاقات میں بلوچستان کی سیاسی صورتحال، ترقیاتی اقدامات، عوامی فلاحی منصوبوں اور وفاقی حکومت کے تعاون پر تفصیلی گفتگو ہوئی۔
اسپیکر ایاز صادق نے بلوچستان میں جاری بڑے ترقیاتی منصوبوں کو خوش آئند قرار دیتے ہوئے کہا کہ صوبے کی ترقی دراصل پاکستان کی ترقی ہے۔ انہوں نے بلوچستان کے لیے ہر سطح پر مکمل تعاون کی یقین دہانی بھی کرائی۔
وزیر اعلیٰ سرفراز بگٹی نے اسپیکر قومی اسمبلی کی پارلیمانی خدمات اور ایوان کی کارروائی کو موثر انداز میں چلانے پر انہیں خراجِ تحسین پیش کیا۔ انہوں نے کہا کہ بلوچستان کے عوام اور سیکیورٹی فورسز دہشت گردی کے خلاف بہادری سے لڑ رہے ہیں اور پارلیمان صوبوں کی مضبوط آواز ہے۔
