نیوز ڈیسک
کوئٹہ: ملک میں سیکیورٹی صورتحال کے پیش نظر ریلوے انتظامیہ نے کوئٹہ کے لیے ٹرین آپریشن جزوی طور پر معطل کر دیا ہے، جس کے باعث ہزاروں مسافر مشکلات کا شکار ہو گئے ہیں۔ ریلوے حکام کے مطابق پشاور سے کوئٹہ جانے والی جعفر ایکسپریس اور کراچی سے کوئٹہ آنے والی بولان میل کو اچانک بڑھتے ہوئے سیکیورٹی خدشات کے باعث جیکب آباد ریلوے اسٹیشن پر روک دیا گیا ہے۔ حکام کا کہنا ہے کہ ٹرینوں کی روانگی اس وقت تک بحال نہیں کی جائے گی جب تک سیکیورٹی ادارے کلیئرنس نہیں دے دیتے۔
مسافروں کا کہنا ہے کہ بغیر پیشگی اطلاع ٹرینوں کو روکنے سے خواتین، معمر افراد اور بچوں کو شدید پریشانی کا سامنا ہے، جبکہ پلیٹ فارم پر رش میں مسلسل اضافہ دیکھنے میں آ رہا ہے۔ کئی مسافروں نے انتظامیہ سے مطالبہ کیا ہے کہ صورتحال کو فوری طور پر بہتر بنایا جائے اور مسافروں کو کوئی متبادل سہولت فراہم کی جائے۔
ریلوے ذرائع کے مطابق سیکیورٹی ادارے ہائی الرٹ پر ہیں اور جیکب آباد سمیت مختلف مقامات پر چیکنگ کا عمل مزید سخت کر دیا گیا ہے۔ انتظامیہ نے ٹرینوں کی حفاظت سے متعلق اضافی اقدامات کرنے کا فیصلہ بھی کیا ہے۔
ادھر دوسری جانب چمن پسنجر ٹرین کے روٹ پر سفر حسبِ معمول جاری ہے اور حکام نے واضح کیا ہے کہ اس ٹرین کی روانگی یا آمد کے متعلق کوئی تبدیلی نہیں کی گئی۔ چمن پسنجر اپنے مقررہ وقت پر کوئٹہ ریلوے اسٹیشن سے روانہ ہوگی۔
ریلوے حکام نے عوام سے اپیل کی ہے کہ غیر ضروری سفر سے گریز کریں اور سفر سے قبل ریلوے ہیلپ لائن سے ٹرین شیڈول کی تازہ ترین صورتحال ضرور معلوم کریں۔
