نیوز ڈیسک
کوئٹہ: پاکستان پیپلز پارٹی بلوچستان کے پارلیمانی لیڈر میر محمد صادق عمرانی نے وزیر اعلیٰ بلوچستان میر سرفراز بگٹی کی تبدیلی سے متعلق تمام قیاس آرائیوں کو یکسر مسترد کرتے ہوئے انہیں بے بنیاد قرار دیا ہے۔ ان کا کہنا تھا کہ وزیر اعلیٰ کو اتحادی جماعتوں کا مکمل اعتماد حاصل ہے اور حکومت میں تبدیلی کا کوئی امکان نہیں۔
میر صادق عمرانی نے بیان میں کہا کہ اگر سینیٹر دوستین خان ڈومکی کو کوئی تحفظات ہیں تو وہ انہیں مسلم لیگ (ن) کی اعلیٰ قیادت کے سامنے رکھیں۔ انہوں نے واضح کیا کہ وزیر اعلیٰ سرفراز بگٹی تمام اتحادی جماعتوں کے اعتماد اور حمایت کے ساتھ ذمہ داریاں نبھا رہے ہیں۔
پیپلز پارٹی کے پارلیمانی لیڈر نے کہا کہ چیئرمین بلاول بھٹو زرداری پہلے ہی یہ مؤقف دے چکے ہیں کہ جمہوری تسلسل کے لیے وزرائے اعلیٰ کی تبدیلی مناسب نہیں۔ انہوں نے بتایا کہ پارٹی کے ایک پارلیمانی رکن لیاقت لہڑی مسلسل پارٹی پالیسی کی خلاف ورزی کر رہے ہیں، جس کا معاملہ جلد پارٹی قیادت کے سامنے رکھا جائے گا۔ حتمی فیصلہ پارٹی قیادت کرے گی۔
مرکزی اور صوبائی سطح پر سیاسی صورتحال میں پیدا ہونے والی قیاس آرائیوں کے تناظر میں پیپلز پارٹی کے اس بیان کو انتہائی اہم قرار دیا جا رہا ہے، جس سے حکومت کی موجودہ پوزیشن مزید واضح ہو گئی ہے
