کوئٹہ، 13 نومبر: وزیراعلیٰ بلوچستان میر سرفراز بگٹی کی زیر صدارت صوبائی ایپکس کمیٹی کا 20واں اجلاس کوئٹہ میں منعقد ہوا، جس میں کور کمانڈر بلوچستان لیفٹیننٹ جنرل راحت نسیم احمد خان سمیت اعلیٰ سول و عسکری حکام نے شرکت کی۔
اجلاس میں صوبے کی مجموعی سیکیورٹی صورتحال، ترقیاتی منصوبوں کی پیش رفت اور عوامی فلاح سے متعلق امور کا تفصیلی جائزہ لیا گیا۔ کمیٹی نے گزشتہ اجلاس کے فیصلوں پر عملدرآمد کا بھی جائزہ لیا اور انہیں توثیق دی۔
ایپکس کمیٹی نے فیصلہ کیا کہ بھتہ خوروں، سونے کی اسمگلنگ، حوالہ ہنڈی اور مالی جرائم میں ملوث عناصر کے خلاف سخت کریک ڈاؤن کیا جائے۔ اجلاس نے ایف آئی اے بلوچستان کی کارکردگی پر عدم اطمینان کا اظہار کرتے ہوئے ہدایت کی کہ ادارہ وائٹ کالر کرائم اور بھتہ خوری کے نیٹ ورکس کے خلاف مؤثر کارروائیاں کرے۔
کمیٹی نے ریاست مخالف اور منافرت انگیز مواد کی اشاعت و تقسیم پر مکمل پابندی عائد کرنے کا فیصلہ بھی کیا۔
ایک اہم فیصلے میں طے کیا گیا کہ ایم بی بی ایس مکمل کرنے والے ڈاکٹرز کو تین سال کے لیے اپنے آبائی اضلاع میں خدمات انجام دینا لازمی ہوگا تاکہ دیہی علاقوں میں طبی سہولیات کو بہتر بنایا جا سکے۔
ایپکس کمیٹی نے پوست کی کاشت اور اس کے کاروبار میں ملوث افراد کے خلاف سخت کارروائی کی منظوری دی اور فیصلہ کیا کہ ایسے عناصر کے نام فورتھ شیڈول میں شامل کیے جائیں گے۔
اجلاس میں بلوچستان اسپیشل ڈویلپمنٹ انیشییٹیوز کے تحت مکمل ہونے والے منصوبوں پر اطمینان کا اظہار کیا گیا اور متعلقہ محکموں کو زیرِ تکمیل منصوبوں کو جلد مکمل کرنے کی ہدایت دی گئی۔
کمیٹی نے کوئٹہ میں گیس پریشر کی کمی سے متعلق عوامی شکایات کا بھی نوٹس لیتے ہوئے سوئی سدرن گیس کمپنی کے جنرل منیجر کو فوری اقدامات کی ہدایت دی۔
وزیراعلیٰ بلوچستان میر سرفراز بگٹی نے اجلاس سے خطاب کرتے ہوئے کہا کہ بلوچستان میں قیام امن کے لیے اٹھائے گئے اقدامات مثبت نتائج دے رہے ہیں۔ انہوں نے ایف آئی اے کو ہدایت کی کہ بھتہ خوروں، اسمگلروں، منی لانڈرنگ اور وائٹ کالر جرائم میں ملوث عناصر کے خلاف کارروائی تیز کی جائے۔
وزیراعلیٰ نے واضح کیا کہ ریاست مخالف اور منافرت پر مبنی مواد ناقابل برداشت ہے، اور اس کے خلاف کارروائی قابلِ تحسین ہے۔
انہوں نے کہا کہ ڈاکٹرز کو اپنے مقامی اضلاع میں تین سال کی سروس لازمی ادا کرنی ہوگی تاکہ عوام کو بہتر طبی سہولیات میسر آ سکیں، جبکہ پوست کی کاشت اور اس کے لین دین میں ملوث افراد کے خلاف سخت کارروائی کی جائے گی۔
میر سرفراز بگٹی نے کہا کہ بلوچستان اسپیشل ڈویلپمنٹ انیشییٹیوز کے تحت عوام کو بنیادی سہولیات فراہم کی جا رہی ہیں اور حکومت کوئٹہ میں گیس پریشر کے مسائل کے فوری حل کے لیے اقدامات کر رہی ہے۔
