پاک فوج کے 62 ہزار سے زائد آپریشن، 582 جوان شہید

راولپنڈی (ویب ڈیسک):
ڈی جی آئی ایس پی آر لیفٹیننٹ جنرل احمد شریف چوہدری نے انکشاف کیا ہے کہ سال 2024 کے دوران پاک فوج نے ملک بھر میں 62 ہزار سے زائد آپریشنز کیے، جن میں 582 جوانوں نے جامِ شہادت نوش کیا جبکہ 1,667 دہشت گرد ہلاک ہوئے۔

انہوں نے کہا کہ دہشت گردی کے خاتمے اور قومی سلامتی کے تحفظ کے لیے پاک فوج کی قربانیاں ناقابلِ فراموش ہیں۔
لیفٹیننٹ جنرل احمد شریف نے واضح کیا کہ پاکستان آرمی نے بلوچستان، خیبرپختونخوا اور دیگر علاقوں میں دہشت گردوں کے خلاف بھرپور کارروائیاں کیں، جن کے نتیجے میں کئی شدت پسند نیٹ ورکس کو تباہ کیا گیا۔

ڈی جی آئی ایس پی آر کے مطابق آپریشنز کا مقصد پاکستان میں پائیدار امن قائم کرنا اور عوام کے جان و مال کا تحفظ یقینی بنانا ہے۔
انہوں نے کہا کہ فوج کے حوصلے بلند ہیں اور دہشت گردی کی کمر توڑنے تک کارروائیاں جاری رہیں گی۔

لیفٹیننٹ جنرل احمد شریف چوہدری نے مزید کہا کہ پاک فوج قومی سلامتی کی ضامن ہے، اور ادارے کی غیر جانب داری برقرار رکھنے کے لیے سیاست سے دور رہنا ضروری ہے۔
انہوں نے یہ بھی کہا کہ “ہمارے جوان اپنی جانیں وطن کی خاطر قربان کر رہے ہیں، یہ ہماری سب سے بڑی طاقت ہے۔”