خبر:
اسلام آباد — وفاقی تحقیقاتی ایجنسی (ایف آئی اے) نے بڑی کارروائی کرتے ہوئے ایران سمندر کے راستے غیر قانونی طور پر جانے کی کوشش کرنے والے 9 ملزمان کو گرفتار کر لیا۔ یہ کارروائی ایف آئی اے کمپوزٹ سرکل گوادر نے بلوچستان کے ساحلی علاقے جیوانی میں کی۔
ایف آئی اے کے مطابق گرفتار ملزمان کا تعلق پنجاب کے مختلف اضلاع سے ہے، جن میں سے 6 ملزمان منڈی بہاؤالدین، 2 گوجرانوالہ اور 1 شیخوپورہ سے تعلق رکھتے ہیں۔
ابتدائی تفتیش میں انکشاف ہوا ہے کہ گرفتار ملزمان ایران کے راستے دیگر ممالک غیر قانونی طور پر جانے کی منصوبہ بندی کر رہے تھے۔ ایف آئی اے نے ملزمان کے خلاف مقدمہ درج کر کے مزید تحقیقات کا آغاز کر دیا ہے۔
ایف آئی اے کے ترجمان کے مطابق انسانی اسمگلنگ اور غیر قانونی بارڈر کراسنگ میں ملوث عناصر کے خلاف ملک بھر میں کریک ڈاؤن جاری ہے، اور تمام تر وسائل بروئے کار لائے جا رہے ہیں تاکہ اس غیر قانونی کاروبار کو ختم کیا جا سکے۔
