پشاور: تحریک انصاف کے رہنما سہیل آفریدی کو پیر کے روز خیبر پختونخوا اسمبلی کے اجلاس میں نیا وزیراعلیٰ منتخب کر لیا گیا۔ اجلاس میں اپوزیشن جماعتوں کے واک آؤٹ کے باوجود انتخابی عمل جاری رہا۔
اسمبلی اسپیکر بابر سلیم سواتی کے مطابق سہیل آفریدی نے 145 رکنی ایوان میں سے 90 ووٹ حاصل کیے، جبکہ جے یو آئی (ف)، مسلم لیگ (ن) اور پیپلز پارٹی کے امیدواروں کو کوئی ووٹ نہیں ملا۔ اسپیکر نے بتایا کہ تین ارکان اس وقت بیرونِ ملک ہیں۔
نتائج کے اعلان کے بعد ایوان میں “سہیل آفریدی زندہ باد” کے نعرے گونج اٹھے اور تحریک انصاف کے ارکان نے عمران خان کے فیصلے کو تاریخی قرار دیا۔
اپنی پہلی تقریر میں سہیل آفریدی نے کہا کہ وہ عمران خان کے شکر گزار ہیں جنہوں نے ایک عام کارکن، درمیانے طبقے سے تعلق رکھنے والے شخص کو قیادت کے قابل سمجھا۔
انہوں نے کہا، “نہ میرا تعلق بھٹو، زرداری یا شریف خاندان سے ہے، میں قبائلی علاقوں سے ہوں اور اپنے پس منظر پر فخر ہے۔”
آفریدی نے کہا کہ عمران خان نے ہمیشہ قبائلی عوام کی محرومیوں کو محسوس کیا اور ان کے نمائندے کے طور پر انہیں منتخب کیا۔ انہوں نے عزم ظاہر کیا کہ وہ عمران خان کے ویژن برائے انصاف، ترقی اور گڈ گورننس پر عمل کرتے ہوئے صوبے کے عوام کی خدمت کریں گے
