ویب ڈیسک
اسلام آباد: 11ویں قومی مالیاتی کمیشن (این ایف سی) ایوارڈ کا ابتدائی اجلاس 29 اگست کو منعقد ہوگا، جس کا ایجنڈا بھی جاری کردیا گیا ہے۔ اجلاس کی صدارت وفاقی وزیر خزانہ اور چیئرمین این ایف سی، محمد اورنگزیب کریں گے۔
ذرائع کے مطابق اجلاس میں شرکت کے لیے این ایف سی کے تمام ارکان کو دعوت دی جاچکی ہے۔ ابتدائی اجلاس میں تین نکاتی ایجنڈے پر غور کیا جائے گا جن میں این ایف سی ایوارڈ سے متعلق سفارشات، ذیلی گروپس کی تشکیل، اور آئندہ اجلاسوں کا شیڈول شامل ہے۔
واضح رہے کہ دو روز قبل صدرِ مملکت آصف علی زرداری نے آئین کے آرٹیکل 160(1) کے تحت 11ویں این ایف سی ایوارڈ کی تشکیل کی منظوری دی تھی۔ وزارتِ خزانہ کے نوٹیفکیشن کے مطابق کمیشن 9 ارکان پر مشتمل ہے، جن میں وفاقی وزیر خزانہ بطور چیئرمین اور چاروں صوبوں کے وزرائے خزانہ بطور رکن شامل ہیں۔
اس کے علاوہ پنجاب سے سابق بیوروکریٹ ناصر محمود کھوسہ، سندھ سے ماہر معاشیات ڈاکٹر اسد سید، خیبر پختونخوا سے ڈاکٹر مشرف رسول اور بلوچستان سے فرمان اللہ کمیشن کے رکن نامزد کیے گئے ہیں۔
ابتدائی اجلاس میں وفاق اور چاروں صوبوں کی جانب سے موجودہ مالیاتی صورتحال پر بریفنگ بھی دی جائے گی، جس کی روشنی میں آئندہ سفارشات مرتب کی جائیں گی۔
