اسلام آباد – 22 اگست 2025: وزیر اعلیٰ بلوچستان میر سرفراز بگٹی نے اسلام آباد میں برطانیہ کی ہائی کمشنر مس جین میریوٹ سے ملاقات کی۔ اس ملاقات میں باہمی تعاون کو فروغ دینے، موسمیاتی تبدیلی کے اثرات سے نمٹنے، اچھی حکمرانی کے فروغ، امن و امان کی بہتری، تعلیم اور صحت کے شعبوں میں جاری اصلاحات کے ساتھ ساتھ صوبے کی مجموعی ترقیاتی حکمت عملی پر تفصیلی گفتگو کی گئی۔
وزیر اعلیٰ نے کہا کہ موسمیاتی تبدیلی بلوچستان کے لیے ایک بڑا چیلنج ہے، اس لیے صوبے نے پہلی بار کلائمیٹ فنڈ قائم کیا ہے تاکہ ماحولیاتی خطرات اور قدرتی آفات کے مقابلے کے لیے مؤثر حکمت عملیاں اپنائی جا سکیں۔ ان کا کہنا تھا کہ بہتر گورننس اور شفافیت کے لیے نئے اقدامات کیے گئے ہیں اور گزشتہ مالی سال کے دوران غیر ترقیاتی اخراجات سے 14 ارب روپے کی بچت ممکن بنائی گئی۔
انہوں نے مزید بتایا کہ بینظیر بھٹو اسکالرشپ پروگرام کے تحت طلبہ کو معیاری تعلیم فراہم کی جا رہی ہے، اور اس میں شہداء کے بچوں کے ساتھ ساتھ ٹرانس جینڈر کمیونٹی، اقلیتوں اور پسماندہ طبقات کو بھی شامل کیا گیا ہے تاکہ سب کو یکساں تعلیمی مواقع مل سکیں۔ نوجوانوں کی معاشی خود مختاری کے لیے اخوت کے تعاون سے بلا سود قرضوں کا پروگرام بھی متعارف کروایا جا رہا ہے۔
محکمہ تعلیم میں 16 ہزار کنٹریکٹ اساتذہ کو میرٹ پر بھرتی کرنے کے ساتھ ساتھ تعلیم و صحت کے محکموں میں اصلاحاتی اقدامات جاری ہیں تاکہ عوام کو بنیادی سہولیات بہتر انداز میں میسر ہوں۔ وزیر اعلیٰ نے یہ بھی بتایا کہ صوبے کی تاریخ میں پہلی مرتبہ یوتھ پالیسی تشکیل دی گئی ہے اور ’’چیف منسٹر یوتھ اسکلز ڈویلپمنٹ پروگرام‘‘ کے تحت 30 ہزار نوجوانوں کو تربیت دے کر بیرون ملک روزگار فراہم کرنے کا منصوبہ بنایا گیا ہے۔
برطانوی ہائی کمشنر مس جین میریوٹ نے بلوچستان حکومت کے اقدامات کو سراہتے ہوئے کہا کہ گڈ گورننس، تعلیم، صحت اور نوجوانوں کی ترقی کے لیے صوبائی حکومت کی کوششیں قابل تعریف ہیں۔ ملاقات میں یہ بھی طے پایا کہ سی ٹی ڈی پولیس کی صلاحیتوں کو بڑھانے کے لیے برطانیہ تربیتی تعاون فراہم کرے گا اور مختلف شعبوں میں اشتراک مزید وسیع کیا جائے گا
