کوئٹہ، 19 اگست – حکومت بلوچستان نے صوبے کی تمام جیلوں میں قیدیوں کی ٹی بی، ہیپاٹائٹس اور ایڈز کی اسکریننگ کا فیصلہ کیا ہے۔ یہ اقدام وزیر اعلیٰ میر سرفراز بگٹی، صوبائی وزیر صحت بخت محمد کاکڑ اور سیکریٹری صحت مجیب الرحمن پانیزئی کی خصوصی ہدایات پر اٹھایا گیا۔
اس فیصلے کا مقصد قیدیوں اور جیل عملے کی صحت کا تحفظ اور متعدی امراض کے پھیلاؤ کو روکنا ہے۔ بلوچستان ٹی بی کنٹرول پروگرام کے تحت منعقدہ اجلاس میں ڈاکٹر شیرافگن رئیسانی، ڈاکٹر سرین نوشیروانی، ڈاکٹر امیر علی بگٹی، ڈاکٹر ایمل خان، ڈاکٹر محمد شاہد ترین اور ڈاکٹر داؤد اچکزئی نے شرکت کی۔
اجلاس میں جیلوں میں صحت عامہ کے اقدامات اور اسکریننگ پروگرام کے عملی پہلوؤں پر تفصیلی غور و خوض کیا گیا۔ ماہرین نے اس بات پر زور دیا کہ قیدیوں کے لیے جامع صحت حکمت عملی اپنانا لازمی ہے تاکہ مہلک امراض کی بروقت تشخیص اور مؤثر علاج یقینی بنایا جا سکے۔
محکمہ صحت کے مطابق یہ اسکریننگ نہ صرف قیدیوں کو بہتر علاج کی سہولت دے گی بلکہ جیلوں میں صحت مند ماحول قائم کرنے، عملے کو محفوظ رکھنے اور صوبے کے مجموعی صحت کے نظام کو مضبوط بنانے میں بھی مددگار ثابت ہوگی۔
حکام نے کہا کہ یہ اقدام بلوچستان میں بیماریوں کے بوجھ کو کم کرنے اور عوامی صحت کو فروغ دینے میں سنگ میل ثابت ہوگا، جو حکومت بلوچستان کے صحت دوست ویژن کی عکاسی کرتا ہے
