سٹاف رپورٹر:
کوئٹہ – حکومت بلوچستان نے جھالاوان میڈیکل کالج اینڈ اسپتال منصوبے کی تکمیل میں غیر معمولی تاخیر پر پروجیکٹ ڈائریکٹر کو عہدے سے ہٹا دیا ہے۔ اب اس منصوبے پر کام کی ذمہ داری محکمہ مواصلات و تعمیرات کو سونپ دی گئی ہے۔
یہ فیصلہ وزیراعلیٰ بلوچستان میر سرفراز بگٹی کی زیر صدارت اجلاس میں کیا گیا، جس میں صوبائی وزیر صحت بخت محمد کاکڑ، قائد حزب اختلاف میر یونس عزیز زہری اور اعلیٰ حکام شریک ہوئے۔
اجلاس میں وزیراعلیٰ نے منصوبے کی سست رفتاری پر افسوس کا اظہار کرتے ہوئے متعلقہ محکموں کو ہدایت کی کہ ازسرنو پی سی ون تیار کیا جائے اور منصوبے پر فوری رفتار سے کام شروع کیا جائے۔
حکومتی ذرائع کے مطابق یہ اقدام منصوبے کو فعال بنانے اور صوبے میں صحت کی سہولیات کو بہتر بنانے کے لیے کیا گیا ہے تاکہ عوام کو بروقت طبی سہولیات فراہم کی جا سکیں
