ویب ڈیسک
ایران اور اسرائیل کے درمیان جاری خون ریز جنگ کے اثرات خطے کے دیگر ممالک تک بھی پھیلنے لگے ہیں۔ حالیہ کشیدگی کے باعث پاکستان کا بین الاقوامی فلائٹ آپریشن شدید متاثر ہوا ہے، جس کے نتیجے میں متعدد پروازیں منسوخ اور تاخیر کا شکار ہو گئی ہیں۔
16 پروازیں منسوخ، متعدد تاخیر کا شکار
ایوی ایشن ذرائع کے مطابق ایران کی فضائی حدود کی بندش کے سبب پاکستان سے ایران، عراق، سعودی عرب اور دیگر مشرقِ وسطیٰ کے ممالک کو جانے والی 16 پروازیں منسوخ کر دی گئی ہیں۔
منسوخ ہونے والی پروازوں میں کراچی سے جدہ، مشہد، بغداد اور تہران جانے والی 8 اہم پروازیں شامل ہیں، جب کہ اسلام آباد سے نجف کی دو بین الاقوامی پروازیں بھی متاثر ہوئیں۔
علاوہ ازیں، اسلام آباد آنے والی پروازیں — جن میں جدہ، دبئی، بحرین اور راس الخیمہ سے آنے والی فلائٹس شامل ہیں — بھی ایک سے پانچ گھنٹے تک تاخیر کا شکار ہوئیں۔
جنگ کا پس منظر
ایران اور اسرائیل کے درمیان کشیدگی کا آغاز 12 جون کو اس وقت ہوا جب اسرائیل نے ایران کے مختلف حساس مقامات پر حملے کیے، جن میں پاسداران انقلاب کے سربراہ، ایرانی آرمی چیف، چھ جوہری سائنسدان اور پانچ عام شہری شہید ہوئے۔ اس حملے کے بعد ایران نے شدید ردِعمل کا اظہار کرتے ہوئے اسرائیل کے خلاف جوابی کارروائی کا اعلان کیا، جس کے نتیجے میں دونوں ممالک عملی جنگ میں داخل ہو چکے ہیں۔
پاکستانی مسافر شدید متاثر
فلائٹ منسوخی اور تاخیر سے متاثر ہونے والے سینکڑوں پاکستانی مسافروں کو ایئرپورٹس پر شدید مشکلات کا سامنا کرنا پڑا۔ ایوی ایشن حکام کا کہنا ہے کہ صورتحال کا مسلسل جائزہ لیا جا رہا ہے اور مسافروں کو جلد از جلد متبادل پروازیں فراہم کرنے کی کوشش کی جا رہی ہے۔
📢 اپنے سفر سے قبل ایئرلائن سے تصدیق ضرور کریں تاکہ کسی بھی ممکنہ پریشانی سے بچا جا سکے۔
