کوئٹہ – 13 جون 2025:
وزیر اعلیٰ بلوچستان میر سرفراز بگٹی کی قیادت میں موجودہ صوبائی حکومت نے پبلک سیکٹر ڈیولپمنٹ پروگرام (PSDP) کے تحت ترقیاتی فنڈز کے 90 فیصد استعمال کے ساتھ گزشتہ 10 برسوں کا بلند ترین ریکارڈ قائم کر دیا ہے۔ یہ اعلان حکومتی ترجمان شاہد رند نے ایک بیان میں کیا۔
ترجمان نے اس کامیابی کو وزیر اعلیٰ کی بہترین قیادت، مؤثر حکمت عملی اور سخت نگرانی کا نتیجہ قرار دیا۔ ان کے مطابق، “یہ کامیابی وزیراعلیٰ سرفراز بگٹی کے شفافیت اور میرٹ پر مبنی وژن کی عملی تعبیر ہے۔”
صوبائی حکومت نے مالی سال 2024-25 کے اختتام تک 100 فیصد ترقیاتی فنڈز کے مؤثر استعمال کا ہدف مقرر کیا ہے، جبکہ رواں مالی سال کے دوران 3 ہزار 230 ترقیاتی اسکیمیں مکمل کی جائیں گی۔
ترقیاتی بجٹ میں شعبہ وار تقسیم:
- 21 فیصد فنڈز سڑکوں کی تعمیر کے لیے
- 18 فیصد آبپاشی منصوبوں کے لیے
- 2.3 فیصد توانائی کے منصوبوں کے لیے
- 11 فیصد تعلیم،
- 8 فیصد صحت
- 7 فیصد پبلک ہیلتھ
- 6 فیصد پیداواری شعبوں (زراعت، ماہی گیری، معدنیات) کے لیے مختص کیے گئے
ترجمان نے ماضی کی حکومتوں کے مقابلے میں موجودہ حکومت کی کارکردگی کو نمایاں قرار دیا۔ ان کے مطابق 2021-22 میں 53 فیصد، 2022-23 میں 66 فیصد، اور 2023-24 میں صرف 55 فیصد فنڈز استعمال ہوئے تھے۔
شاہد رند نے کہا، “موجودہ حکومت کی کارکردگی بلوچستان کی تاریخ کا روشن باب ہے۔” انہوں نے مزید کہا کہ شفافیت، احتساب اور وسائل کے بروقت استعمال نے وزیراعلیٰ کے وژن کو حقیقت کا روپ دیا ہے
